مصنوعی ذہانت یا اے آئی کی معروف کمپنی اوپن اے آئی اپنے پہلے صارفین کے لیے تیار کیے جانے والے ہارڈویئر ڈیوائس پر تیزی سے کام کر رہی ہے جبکہ نئی رپورٹ میں اس کے متوقع پورٹیبل اور اسکرین کے بغیر اے آئی اسپیکر کی مزید تفصیلات سامنے آگئی ہیں۔
یہ بھی پڑھیں: مصنوعی ذہانت نے اپنے رنگ دکھانے شروع کردیے، اوپن اے آئی کا جدید ماڈل بے قابو، سائبر حملہ کردیا
بلوم برگ کی رپورٹ کے مطابق اوپن اے آئی کا نیا اسمارٹ اسپیکر روایتی اسپیکرز سے مختلف ہوگا۔ یہ ڈونَٹ (رِنگ) نما ڈیزائن پر مشتمل ہوگا اس کی قیمت 300 امریکی ڈالر سے زائد ہونے کا امکان ہے اور اسے گھر میں آسانی سے ایک ہاتھ سے اٹھا کر کہیں بھی استعمال کیا جا سکے گا۔
رپورٹ کے مطابق یہ ڈیوائس سائز میں ہاکی پک کے برابر ہوگی اور اسے بجلی کے ساتھ مستقل منسلک رکھنے کی ضرورت نہیں ہوگی جس کے باعث اسے پورٹیبل انداز میں استعمال کیا جا سکے گا۔ اس سے قبل وال اسٹریٹ جرنل نے بھی رپورٹ کیا تھا کہ یہ ڈیوائس اتنی چھوٹی ہوگی کہ اسے جیب میں بھی رکھا جا سکے گا۔
بتایا گیا ہے کہ اسپیکر کو اعلیٰ معیار کی دھاتوں سے تیار کیا جائے گا تاکہ اسے پریمیم شکل دی جا سکے جبکہ اس کا ڈیزائن ایپل کی معروف ڈیزائن پالیسی کا مقابلہ کرنے کے لیے تیار کیا جا رہا ہے۔
یہ ڈیوائس لوو فرام نامی ڈیزائن اسٹوڈیو کے تعاون سے تیار کی جا رہی ہے جس کی بنیاد ایپل کے سابق چیف ڈیزائنر جونی آئیو نے رکھی تھی۔ اوپن اے آئی نے گزشتہ سال جونی آئیو کے ہارڈویئر اسٹارٹ اپ آئی او کو خرید لیا تھا جسے کمپنی کے سافٹ ویئر سے آگے بڑھ کر ہارڈویئر مارکیٹ میں داخل ہونے کی اہم پیش رفت قرار دیا گیا۔
مزید پڑھیے: سپر ایپ کے تصور کی جانب بڑا قدم: اوپن اے آئی کا جی پی ٹی 5.5 ماڈل متعارف
رپورٹس کے مطابق اس ڈیوائس میں ایسے میکینیکل اجزا شامل ہوں گے جو اسے نسبتاً انسانی انداز میں ردِعمل دینے کے قابل بنائیں گے۔ اس کے علاوہ اس میں کیمرے، مائیکروفون، مختلف سینسرز اور ای میل تک رسائی جیسی سہولیات بھی موجود ہوں گی تاکہ یہ صارف اور اس کے اردگرد کے ماحول کو مدنظر رکھتے ہوئے زیادہ ذاتی نوعیت کی معاونت فراہم کر سکے۔
اسپیکر پر ایک خصوصی لائٹ بھی نصب ہوگی جو یہ ظاہر کرے گی کہ ڈیوائس اس وقت صارف کی بات سن رہی ہے۔
رپورٹ کے مطابق یہ ڈیوائس بنیادی طور پر چیٹ جی پی ٹی کے موجودہ وائس موڈ کا زیادہ جدید اور بہتر ورژن ہوگی جسے اوپن اے آئی کی جانب سے سنہ 2027 میں متعارف کرائے جانے کا امکان ظاہر کیا جا رہا ہے۔
تاہم کمپنی نے اب تک اس ڈیوائس کی باضابطہ لانچنگ، قیمت یا دستیابی کی تاریخ کے حوالے سے کوئی سرکاری اعلان نہیں کیا ہے۔
مزید پڑھیں: اوپن اے آئی رواں سال ساڑھے 3 ہزار نئی بھرتیاں کرے گی
واضح رہے کہ اوپن اے آئی کا یہ اے آئی اسپیکر دراصل ایک الگ ہارڈویئر ڈیوائس ہوگی جسے صارفین کو دیگر الیکٹرانک آلات کی طرح علیحدہ سے خریدنی ہوگا۔ یہ صرف کسی موبائل ایپ یا سافٹ ویئر اپ ڈیٹ تک محدود نہیں ہوگی بلکہ ایک پورٹیبل اسمارٹ ڈیوائس ہوگی جو چیٹ جی پی ٹی کے جدید وائس اسسٹنٹ کے طور پر کام کرے گی اور صارف کی آواز کے ذریعے مختلف کام انجام دینے کی صلاحیت رکھے گی۔
اگرچہ اوپن اے آئی نے اس ڈیوائس کی حتمی خصوصیات کا باضابطہ اعلان نہیں کیا تاہم رپورٹس کے مطابق یہ صارف کی روزمرہ سرگرمیوں میں معاونت، سوالات کے جواب دینے، یاد دہانیاں کرانے، ای میل اور دیگر معلومات تک رسائی سمیت مختلف اے آئی فیچرز فراہم کرے گی۔
کمپنی کی جانب سے اس ڈیوائس کو سنہ 2027 کے دوران متعارف کرائے جانے کا امکان ظاہر کیا جا رہا ہے تاہم اس کی حتمی قیمت، دستیابی اور تمام فیچرز کا اعلان لانچ کے وقت کیا جائے گا۔
اس ڈیوائس کی خاص بات یہ ہے کہ اس میں روایتی اسکرین موجود نہیں ہوگی یعنی صارف کو معلومات دیکھنے یا آپشنز منتخب کرنے کے لیے کسی ڈسپلے کی ضرورت نہیں پڑے گی۔ اس کے بجائے صارف اپنی آواز کے ذریعے ڈیوائس سے بات کرے گا اور اے آئی کی مدد سے جوابات بھی آواز کی صورت میں حاصل کرے گا۔
ماہرین کے مطابق اس تصور کا مقصد ایسا اے آئی اسسٹنٹ تیار کرنا ہے جو موبائل فون یا اسمارٹ اسپیکر سے بھی زیادہ قدرتی انداز میں صارف کے ساتھ تعامل کر سکے۔
یہ بھی پڑھیے: ڈیٹا سینٹرز میں بجلی کی بے تحاشا کھپت، اوپن اے آئی نے حل ڈھونڈ لیا
اگر یہ منصوبہ کامیاب رہا تو مستقبل میں اس طرح کی اسکرین کے بغیر کام کرنے والی اے آئی ڈیوائسز روزمرہ زندگی میں معاونت کا ایک نیا طریقہ بن سکتی ہیں تاہم اوپن اے آئی نے ابھی اس ڈیوائس کی حتمی خصوصیات یا باضابطہ لانچ کی تاریخ کا اعلان نہیں کیا ہے۔
