پاکستانی اداکارہ نادیہ افغان نے جانوروں خصوصاً آوارہ کتوں کے خلاف تشدد کی مخالفت کرتے ہوئے کہا ہے کہ بچوں کو جانوروں کے ساتھ رحم دلی اور محبت کا رویہ اپنانے کی تربیت دینی چاہیے۔
یہ بھی پڑھیں: پاکستانی شوبز کی کامیاب بے اولاد جوڑیاں
ایک گفتگو میں نادیہ افغان نے کہا کہ معاشرے میں کتوں کو مارنے کا رجحان بچوں پر بھی منفی اثر ڈالتا ہے اور انہیں یہ پیغام ملتا ہے کہ ہر مسئلے کا حل تشدد ہے۔
انہوں نے کہا کہ سڑکیں بچوں اور جانوروں سمیت کسی کے لیے مکمل طور پر محفوظ نہیں، تاہم آوارہ کتوں کو مارنے کے بجائے ان کی ویکسینیشن، خوراک اور دیکھ بھال کے ذریعے صورتحال بہتر بنائی جاسکتی ہے۔
یہ بھی پڑھیں: شدید گرمی کی لہر، جگن کاظم کی عوام سے بے زبان جانوروں کی حفاظت کی اپیل
نادیہ افغان کے مطابق کتوں کو زہر دے کر یا گولیاں مار کر ختم کرنے کے بجائے انہیں ویکسین لگائی جائے تو نہ صرف بیماریوں کے پھیلاؤ کو روکا جاسکتا ہے بلکہ سڑکیں بھی زیادہ محفوظ ہوسکتی ہیں۔
انہوں نے اپنے بچپن کا ذکر کرتے ہوئے بتایا کہ ان کے گھر میں بھی کتا تھا اور ان کی والدہ جانوروں کو بچانے اور ان کی دیکھ بھال کرنے کا شوق رکھتی تھیں، جو انہیں اپنی نانی سے ورثے میں ملا تھا۔
