پاکستان کے 79ویں یومِ آزادی کے موقع پر لائف بوائے رن فار پاکستان 2026 نے ملک بھر اور دنیا کے مختلف حصوں میں مقیم پاکستانیوں کو کھیل، صحت، اتحاد اور قومی جذبے کے تحت ایک پلیٹ فارم پر اکٹھا کردیا، ایونٹ میں مجموعی طور پر 3500 سے زیادہ پاکستانیوں نے شرکت کی۔
اس خصوصی جشنِ آزادی رن کا انعقاد اسپورٹس اِن پاکستان نے کیا، جبکہ لاہور میں سرگرمی کے لیے فالکن ٹرائیتھلون کلب اور اسلام آباد میں اسلام آباد رنرز کلب نے شراکت داری کی۔
کراچی میں ہونے والی سرگرمی میں 2500 سے زیادہ رنرز نے ڈی ایچ اے فیز 8 میں شرکت کی، جبکہ اسلام آباد میں 400 سے زیادہ اور لاہور میں 300 سے زیادہ رنرز نے جشنِ آزادی کے اس منفرد انداز میں حصہ لیا۔ پاکستان سے باہر دنیا کے مختلف ممالک اور شہروں میں مقیم کم از کم 100 پاکستانیوں نے ورچوئل رن کے ذریعے ایونٹ کا حصہ بن کر پاکستان سے اپنی وابستگی کا اظہار کیا۔
شرکاء کے لیے 7، 14 اور 21 کلومیٹر کی مختلف کیٹیگریز رکھی گئی تھیں، جن میں مختلف عمر اور صلاحیتوں کے رنرز نے شرکت کی۔
لائف بوائے رن فار پاکستان کو ایک مسابقتی ریس کے بجائے جشنِ آزادی کے لیے ایک خصوصی رن کے طور پر منعقد کیا گیا تھا۔ ایونٹ میں پوزیشن یا رفتار کو اہمیت نہیں دی گئی بلکہ منتظمین کے لیے ہر وہ شخص فاتح تھا جس نے شرکت کی، دوڑ لگائی اور پاکستان کے یومِ آزادی کو صحت مند سرگرمی کے ذریعے منایا۔
اسپورٹس اِن پاکستان کے چیف ایگزیکٹو آفیسر شعیب نظامی نے ایونٹ کے بعد گفتگو کرتے ہوئے کہا کہ ’لائف بوائے رن فار پاکستان کو ملنے والا ردعمل ہماری توقعات سے بڑھ کر رہا۔ کراچی، لاہور اور اسلام آباد سمیت دنیا کے مختلف حصوں سے 3500 سے زائد پاکستانیوں نے ایک ہی پیغام کے ساتھ شرکت کی کہ ہم پاکستان کے لیے دوڑتے ہیں۔‘
شعیب نظامی نے کہا کہ ’یہ دوڑ اس بات کے لیے نہیں تھی کہ کون سب سے تیز دوڑتا ہے یا کون پہلے فنش لائن عبور کرتا ہے۔
جس شخص نے ایونٹ میں شرکت کی، بِب پہنا، پاکستانی پرچم تھاما اور اپنے ملک کی آزادی کا جشن دوڑ کے ذریعے منایا، وہ ہمارے لیے فاتح ہے۔ اصل کامیابی ہزاروں پاکستانیوں کو صحت، کھیل اور اتحاد کے ذریعے ایک ساتھ دیکھنا تھی۔‘
ورچوئل رن نے ایونٹ کے دائرہ کار کو پاکستان کی سرحدوں سے باہر بھی پہنچایا، جہاں مختلف ممالک اور شہروں میں مقیم پاکستانیوں نے اپنے اپنے علاقوں میں دوڑتے ہوئے جشنِ آزادی میں شرکت کی اور پاکستان سے اپنی محبت اور وابستگی کا اظہار کیا۔
اس سال ایونٹ کی ایک خاص بات یومِ قائدِاعظم میڈل بھی تھا، جو قائدِاعظم محمد علی جناح کے یومِ پیدائش کے 150 سال مکمل ہونے کی مناسبت سے تیار کیا گیا تھا۔ میڈل کا مقصد صرف ریس مکمل کرنے کی یادگار فراہم کرنا نہیں بلکہ بانیٔ پاکستان کے ورثے اور ان کی جدوجہد کو خراجِ عقیدت پیش کرنا بھی تھا۔
شعیب نظامی نے کہا ’یومِ قائدِاعظم میڈل نے اس سال کی رن فار پاکستان کو مزید خصوصی بنا دیا۔ کچھ میڈلز کامیابی اور فنش لائن عبور کرنے کی یاد دلاتے ہیں، لیکن یہ میڈل ایک ورثے کی علامت ہے۔
ہم چاہتے تھے کہ ہر شریک اپنے ساتھ ایسی یادگار لے کر جائے جو اس کی دوڑ کے ساتھ ساتھ پاکستان سے اس کے تعلق کی بھی نمائندگی کرے۔‘
لائف بوائے نے رن فار پاکستان 2026 کے ٹائٹل اسپانسر کے طور پر اس اقدام کی معاونت کی، جس کا مقصد صحت مند معاشرے کے فروغ اور لوگوں کو ایک فعال اور صحت مند طرزِ زندگی اپنانے کی ترغیب دینا ہے۔
شعیب نظامی نے لائف بوائے، فالکن ٹرائیتھلون کلب، اسلام آباد رنرز کلب، رضاکاروں، شراکت داروں اور تمام شرکاء کا شکریہ ادا کیا جنہوں نے اس سرگرمی کو ملک گیر اور عالمی جشن میں تبدیل کرنے میں کردار ادا کیا۔
