اسرائیلی کمانڈوز نے فوجی ہیلی کاپٹر کی مدد سے فائرنگ کر کے ایک نوجوان سمیت 4 فلسطینوں کو شہید کر دیا ہے۔ اسرائیلی حملے میں 29 فلسطینی زخمی بھی ہوئے جنہیں اسپتالوں میں طبی امداد دی جا رہی ہے۔
عرب ذرائع ابلاغ کے مطابق پیر کو اسرائیلی کمانڈوز نے مغربی کنارے کے فلسطینی علاقے جنین کے قریب فلسطینیوں پر ہیلی کاپٹر کی مدد سے فائرنگ کی جس سے 4 فلسطینی موقع پر ہی شہید ہو گئے۔
جنین میں قابض اسرائیلی فوج کا حملہ، احتجاج کرنے والے فلسطینیوں پر زمینی دستوں سمیت ہیلی کاپٹر سے فائرنگ#Palestine #israel #WENews pic.twitter.com/inhMJgqznQ
— WE News (@WENewsPk) June 19, 2023
ادھر اسرائیلی افواج نے دعویٰ کیا ہے کہ اس نے جنین پر حملہ کرنے والے فلسطینیوں کو حراست میں لینے کے لیے چھاپہ مارا اور اس دوران اسرائیلی فوجیوں کا مسلح افراد کے ساتھ فائرنگ کا تبادلہ ہوا جس میں کئی مسلح افراد مارے گئے ہیں۔
ادھر ایک غیر ملکی خبررساں ادارے نے بھی ایک ویڈیو جاری کی ہے جس میں دکھایا گیا ہے جس میں ایسا لگتا ہے کہ ایک اسرائیلی ہیلی کاپٹر فائرنگ کے ساتھ چھوٹے میزائل چلا رہا ہے۔ اسی دوران ایک اسرائیلی فوجی گاڑی کے قریب سے دھواں بھی اٹھتا ہوا نظر آ رہا ہے۔
فوجی بیان میں اس بات کی تصدیق بھی کی گئی ہے کہ اسرائیلی ہیلی کاپٹر نے فائرنگ کی ہے اور اس کی ایک گاڑی کے قریب دھماکہ ہوا ہے ۔
ادھر فلسطینی وزارت صحت نے کہا کہ شہید ہونے والے 3 افراد میں ایک 15 سال کا بچہ بھی شامل ہے۔ اس بارے حوالے سے فوری طور پر کچھ نہیں کہا گیا کہ آیا ان میں سے کسی کا کسی فلسطینی مسلح گروہ سے تعلق تھا۔ جنین سے عینی شاہدین نے بتایا کہ پیر کے اس چھاپے کے دوران کم از کم ایک فلسطینی کو حراست میں بھی لیا گیا ہے ۔
ذرائع ابلاغ کا مزید کہنا ہے کہ اسرائیلی کمانڈوز کی کارروائی کے خلاف فلسطین کے مختلف علاقوں میں احتجاج کیا گیا اور اس دوران مغربی کنارے کے علاقے رام اللہ میں احتجاج کرنے والے فلسطینیوں پر اسرائیلی فورسز نے پھر فائرنگ کی ہے۔
