صدر آصف علی زرداری نے کہا ہے کہ بلوچستان میں امن، ترقی اور عوامی فلاح کے لیے وفاقی اور صوبائی حکومتوں کے درمیان مؤثر تعاون اور رابطہ ناگزیر ہے۔
صدر مملکت نے یہ بات اسلام آباد میں بلوچستان کے وزیراعلیٰ سرفراز بگٹی سے ملاقات کے دوران کہی۔ ملاقات میں بلوچستان کی مجموعی صورتحال، امن و امان اور صوبے میں جاری ترقیاتی منصوبوں پر تبادلہ خیال کیا گیا۔
یہ بھی پڑھیے صدر آصف علی زرداری کی وزیراعلیٰ بلوچستان سے ملاقات میں خاص کیا تھا؟
صدر زرداری نے کہا کہ رقبے کے لحاظ سے پاکستان کے سب سے بڑے صوبے بلوچستان کو خصوصی توجہ اور اضافی وسائل کی ضرورت ہے۔ انہوں نے کہا کہ صوبے کی ترقی میں رکاوٹ ڈالنے کی غیر ملکی حمایت یافتہ دہشتگردوں کی ہر کوشش کو ہر قیمت پر ناکام بنایا جائے گا۔
صدر مملکت نے اس اعتماد کا اظہار کیا کہ وہ دن دور نہیں جب بلوچستان سے دہشتگردی کا مکمل خاتمہ کردیا جائے گا۔ انہوں نے صوبے میں امن و استحکام کے قیام اور عوامی فلاح کے لیے جاری اقدامات کو مزید مؤثر بنانے کی ضرورت پر زور دیا۔
یہ بھی پڑھیے صدرِ مملکت آصف علی زرداری کا بلوچستان میں امن کے خلاف خطرات ناکام بنانے پر سیکیورٹی فورسز کو خراجِ تحسین
ملاقات کے دوران وزیراعلیٰ بلوچستان نے صدر مملکت کو صوبے کی مجموعی صورتحال اور مختلف ترقیاتی منصوبوں پر بریفنگ بھی دی۔
