سیکیورٹی فورسز اور پولیس نے انٹیلی جنس بنیادوں پر کی گئی ملک گیر کارروائیوں کے دوران بھارت کے زیرِ سرپرستی کام کرنے والے ‘فتنہ الخوارج’ اور ‘فتنہ الہندوستان’ کے 49 دہشتگردوں کو ہلاک کر کے ملک میں امن و امان کی فضا کو سبوتاژ کرنے کی بڑی کوششیں ناکام بنا دی ہیں۔
آئی ایس پی آر کے مطابق یہ کارروائیاں فتنہ الخوارج اور فتنہ الہندوستان کے نیٹ ورکس کے خاتمے کے لیے جاری انسدادِ دہشتگردی مہم کا حصہ تھیں۔
خیبرپختونخوا میں کارروائیاں
پاک فوج کے شعبہ تعلقات عامہ (آئی ایس پی آر) کے مطابق خیبر پختونخوا کے اضلاع بنوں، شمالی وزیرستان، اورکزئی اور خیبر میں سیکیورٹی فورسز نے انٹیلی جنس بنیادوں پر تیز ترین کارروائیاں کیں۔
ان آپریشنز کے دوران بھارتی سرپرستی میں متحرک ‘فتنہ الخوارج’ کے 12 دہشتگردوں کو ہلاک کیا گیا۔ کارروائیوں کے دوران بھاری مقدار میں دھماکہ خیز مواد، آئی ای ڈی ریموٹ کنٹرولز، اسلحہ، گولہ بارود اور موٹر سائیکلیں برآمد کر کے موقع پر ہی تباہ کر دی گئیں۔
یہ بھی پڑھیں:جنوبی وزیرستان:سیکیورٹی فورسز نے خودکش حملہ ناکام بنا دیا، 4 فتنہ الخوارج دہشتگرد ہلاک
ان کارروائیوں کے دوران بڑی مقدار میں دھماکہ خیز مواد، آئی ای ڈی ڈیٹونیٹنگ ریموٹس، اسلحہ، گولہ بارود اور موٹر سائیکلیں بھی برآمد کر کے تلف کی گئیں۔
بلوچستان، 10 آپریشنز میں ‘فتنہ الہندوستان’ کے 37 دہشتگرد ڈھیر
دوسری جانب بلوچستان کے اضلاع مستونگ، مچھ، خضدار اور پنجگور میں کی گئی 10 مختلف انٹیلی جنس بیسڈ کارروائیوں میں ‘فتنہ الہندوستان’ سے تعلق رکھنے والے 37 دہشتگردوں کو موثر انداز میں نشانہ بنا کر ہلاک کر دیا گیا۔
ان آپریشنز کے دوران سیکیورٹی فورسز نے اسلحے، بارود کے ڈرمز اور ریموٹ ڈٹونیشن آلات کی بڑی مقدار بھی قبضے میں لے کر تلف کر دی۔
مستقبل کی حکمتِ عملی
آئی ایس پی آر کے مطابق یہ کارروائیاں فیڈرل ایپکس کمیٹی برائے نیشنل ایکشن پلان کی منظور کردہ حکمتِ عملی ‘عزمِ استحکام’ کے تحت جاری انسدادِ دہشتگردی مہم کا حصہ ہیں۔
مزید پڑھیں:سیکیورٹی فورسز کی خیبر پختونخوا میں انٹیلیجنس پر مبنی کارروائیاں، فتنہ الخوارج کے 23 دہشتگرد ہلاک
بیان میں کہا گیا ہے کہ متاثرہ علاقوں میں بھارت کی سرپرستی میں موجود کسی بھی باقی ماندہ خوارج یا دہشتگرد کے خاتمے کے لیے سینیٹائزیشن آپریشنز بھی جاری ہیں۔
سیکیورٹی فورسز نے اس عزم کا اعادہ کیا کہ ملکی سرحدوں کے دفاع کے لیے ان کی جدوجہد غیر متزلزل رہے گی، اور بیرونی سرپرستی میں پلنے والی دہشتگردی کے خاتمے تک سیکیورٹی فورسز اور قانون نافذ کرنے والے ادارے اپنی کارروائیاں پوری قوت کے ساتھ جاری رکھیں گے۔
