انگلینڈ کے فاسٹ بولر برائیڈن کارس کو گرفتاری کے واقعے کی تحقیقات کے دوران پاکستان کے خلاف دوسرے ٹیسٹ کے اسکواڈ سے خارج کردیا گیا، ان کی جگہ سونی بیکر کو ٹیم میں شامل کرلیا گیا ہے۔
برطانوی میڈیا کے مطابق 31 سالہ برائیڈن کارس کو ہفتے کی شب ڈربی کے ایک بار کے باہر مبینہ طور پر نشے میں ہنگامہ آرائی کے شبے میں حراست میں لیا گیا تھا۔ پولیس کے مطابق انہیں کچھ دیر بعد اس شرط پر رہا کردیا گیا کہ وہ علاقہ چھوڑ دیں گے۔
مزید پڑھیں:انگلینڈ کے فاسٹ بولر برائیڈن کارس نائٹ کلب کے باہر ہتھکڑیوں میں پکڑے گئے
انگلینڈ اینڈ ویلز کرکٹ بورڈ نے واقعے کو کرکٹ ریگولیٹر کے حوالے کردیا ہے، جو معاملے کی تحقیقات کرے گا۔ تحقیقات مکمل ہونے تک برائیڈن کارس دوسرے ٹیسٹ کے لیے دستیاب نہیں ہوں گے۔
برائیڈن کارس پاکستان کے خلاف پہلے ٹیسٹ کے لیے انگلینڈ کے اسکواڈ کا حصہ تھے تاہم انہیں پلیئنگ الیون میں شامل نہیں کیا گیا تھا۔ اس کے بعد وہ ڈرہم کی جانب سے ڈربی شائر کے خلاف میچ کھیلنے کے لیے چلے گئے تھے۔
Durham bowler Brydon Carse, who is in England squad for second Test, was released without charge after a nightclub incident while celebrating victory over Derbyshire@willis_macp has the details ⤵️https://t.co/4YXyQWChe5 pic.twitter.com/zFKA3lgPVi
— Telegraph Cricket (@TeleCricket) August 23, 2026
یہ واقعہ انگلینڈ کی ٹیم سے وابستہ رواں موسم گرما کا تیسرا آف فیلڈ معاملہ ہے جس کے باعث کوئی کھلاڑی ٹیسٹ میچ سے باہر ہوا ہے۔
رواں سال جون میں بین اسٹوکس اور گس اٹکنسن بھی ایک نائٹ کلب سے متعلق واقعے کی تحقیقات کے دوران نیوزی لینڈ کے خلاف دوسرے ٹیسٹ سے باہر رہے تھے۔
مزید پڑھیں:ایشز، چوتھا ٹیسٹ: انگلینڈ کی آسٹریلیا کو 15 سال بعد حیران کن شکست
برائیڈن کارس کو 2024 میں ماضی کے بیٹنگ جرائم پر 3 ماہ کی پابندی کا سامنا بھی کرنا پڑا تھا۔ بعد ازاں انہوں نے شاندار کارکردگی کے ذریعے انگلینڈ کی ٹیم میں مستقل جگہ بنائی اور اکتوبر 2024 میں ٹیسٹ ڈیبیو کے بعد انگلینڈ کے کسی بھی بولر سے زیادہ 58 وکٹیں حاصل کیں۔
پاکستان اور انگلینڈ کے درمیان دوسرا ٹیسٹ لارڈز میں کھیلا جائے گا۔ برائیڈن کارس کی غیر موجودگی میں 23 سالہ سونی بیکر کو ایک اور موقع ملے گا، جو جون میں نیوزی لینڈ کے خلاف سیریز کے دوسرے ٹیسٹ میں اپنا ڈیبیو کرچکے ہیں۔
