ملک کو درپیش معاشی مشکلات کے تناظر میں ایک مفصل اقتصادی بحالی کے منصوبے کا اعلان کیا گیا ہے اور ’اسپیشل انویسٹمنٹ فیسیلی ٹیشن کونسل‘ ’سی پیک‘ سے بھی بڑا منصوبہ ثابت ہو گا۔
اس منصوبے میں دفاعی پیداوار، زراعت، لائیواسٹاک، معدنیات، کان کنی، آئی ٹی اور توانائی کے کلیدی شعبوں میں مقامی سطح کے ساتھ ساتھ دوست ممالک کی سرمایہ کاری پر زور ہو گا۔
ان منصوبوں کو تیزی سے آگے بڑھانے کے لیے ’اسپیشل انویسٹمنٹ فیسیلی ٹیشن کونسل‘ کا قیام عمل میں لایا گیا ہے تاکہ ممکنہ سرمایہ کاروں کے لیے ‘سنگل ونڈو’ انٹرفیس کے طور پر کام کیا جا سکے اور ساتھ ہی ایک متفقہ طریقہ کار اختیار کیا جا سکے۔ ان منصوبوں کے انتظامی امور اور ہم آہنگی میں پاک فو ج کا کلیدی کرداررہے گا اور یہ منصوبہ پاکستان کی ترقی کے لیے گیم چینجر کی حیثیت کا حامل ہے۔
مزید پڑھیں
اس منصوبے کے تحت 4 سے 4 سالوں میں15 سے 20 لاکھ لوگوں کو ڈائریکٹ اور 75 لاکھ سے ایک کروڑ کو ان ڈائریکٹ ملازمت کے مواقع فراہم ہوں گے۔ اس کے ساتھ ساتھ اگلے 4 سے 5 سالوں میں اس منصوبے سے برآمدات 70 بلین ڈالر تک جائیں گی۔ منصوبے سے غیر ملکی سرمایہ کاری میں 100 بلین ڈالر کا بھی اضافہ ہو گا۔
اس منصوبے کے تحت اگلے 4 سے 5 سالوں میں زرِمبادلہ کے ذخائر بھی دریافت ہو جائیں گے جو درپیش معاشی مشکلات میں کمی کا باعث بنیں گے۔ ان سیکٹرز میں جب تک فیسیلی ٹیشن نہیں ہو گی سرمایہ کاری نہیں آئے گی۔
اگر یہ منصوبہ پایہ تکمیل تک پہنچ جاتا ہے تو 2035 تک ایک تخمینہ کے مطابق پاکستان ایک ٹریلین ڈالر کی معیشت بن سکتا ہے۔
سیکیورٹی اور معیشت کا ایک دوسرے سے گہرا تعلق ہے اسی وجہ سے پاک فوج اس منصوبے کی کامیابی کے لیے مینجمنٹ، کوآرڈی نیشن اور اپنی تمام تر توانائی صرف کرے گی اور جیسے جیسے یہ پراجیکٹ مضبوط اور مستحکم ہوتا چلا جائے گا فوج کا رول بتدریج کم ہوتا جائے گا۔
یہ نظام تمام اسٹیک ہولڈرز کی نمائندگی کے ساتھ تعاون پر مبنی اور پورے حکومتی نقطہ نظر کے ذریعے اب تک کے پیچیدہ اور طویل کاروباری عمل کو مختصر کر دے گا۔
اس منصوبے کا مقصد وفاق اور صوبوں کے درمیان ہم آہنگی پیدا کرنا ہے تاکہ بروقت فیصلہ سازی اور منصوبہ پر تیزی سے عمل درآمد کو یقینی بنایا جا سکے۔
وفاقی اور صوبائی حکومتوں کی جانب سے اعلیٰ سطح کے وفود کی شرکت تمام تر مشکلات کے باوجود معیشت کو قابو کرنے کے قومی عزم کو واضح طور پر ظاہر کرتی ہے۔ پاک فوج اس منصوبے میں صرف مینجمنٹ اور ٹیکنیکل سپورٹ دے گی تاکہ منصوبے کو کامیابی کے ساتھ پایہ تکمیل تک پہنچایا جا سکے۔
یہاں یہ بات بھی اہم ہے کہ اسپیشل انویسٹمنٹ فیسیلی ٹیشن کونسل کو بورڈ آف انویسٹمنٹ نے نوٹیفائی کر دیا ہے۔
ملک کے معاشی حالات اس بات کا تقاضا کرتے ہیں کے صوبائی اور وفاقی لیول پرباہمی تعاون پر مبنی پالیسی اپنائی جائے تاکہ غیر ملکی سرمایہ کاروں کے اعتماد کو بحال کیا جا سکے اس عمل کو پایہ تکمیل تک پہنچانے میں پاک فوج اپنی سپورٹ فراہم کرے گی تاکہ پراجیکٹ میں مستقل اور دیرپا بنیادوں پر پراگریس کو یقینی بنایا جا سکے۔ اِس فریم ورک کی مثال ہمیں چین اور دیگر ممالک میں بھی ملتی ہے۔
