پاکستان میں ’ڈرائیور لیس‘ گاڑی کا مظاہرہ مہنگا پڑگیا، بے قابو کار پولیس وین میں گھس گئی، ویڈیو وائرل

پاکستان میں ’ڈرائیور لیس‘ ٹیکنالوجی کا مظاہرہ کرنے کی ایک کوشش اس وقت دلچسپ واقعے میں بدل گئی جب بغیر ہاتھ لگائے چلائی جانے والی گاڑی اچانک بے قابو ہوکر قریب کھڑی پولیس وین سے جا ٹکرائی جس کی ویڈیو سوشل میڈیا پر تیزی سے وائرل ہوگئی۔

سوشل میڈیا پر وائرل ہونے والی ویڈیو میں ایک شخص گاڑی کی ڈرائیونگ سیٹ پر بیٹھا دونوں ہاتھوں سے اشارے کرتے ہوئے یہ کہتے دکھائی دیتا ہے کہ ’یقینی طور پر پاکستان میں ٹیلنٹ کی کوئی کمی نہیں۔‘ اسی دوران گاڑی بغیر کسی واضح ڈرائیونگ ان پٹ کے آگے بڑھتی ہے اور اچانک قریب کھڑی پولیس وین سے ٹکرا جاتی ہے۔

’’یقینی طور پر پاکستان میں ٹیلنٹ کی کوئی کمی نہیں‘‘، رپورٹر یہ بتاتے ہوئے بغیر ڈرائیور کے گاڑی چلانے کا تجربہ دکھا رہے تھے جو ناکام ہو گیا، گاڑی پولیس کی وین سے جا ٹکرائی، ڈز کی آواز آئی، رپورٹر نے ہینڈ بریک کھینچنے کی کوشش بھی کی۔۔!! pic.twitter.com/iGHHdY2TCS

— Khurram Iqbal (@khurram143) August 31, 2026

تصادم کے بعد رپورٹر فوری طور پر گاڑی کا ہینڈ بریک کھینچنے کی کوشش کرتا دکھائی دیتا ہے۔

ویڈیو سامنے آنے کے بعد یہ سوشل میڈیا پر تیزی سے وائرل ہوگئی، جہاں صارفین نے واقعے پر مختلف طنزیہ تبصرے کیے۔ بعض صارفین نے اسے پاکستان میں موجود ’ٹیلنٹ‘ کی مثال قرار دیا جبکہ کچھ نے مزاحیہ انداز میں گاڑی کو ہی ’سمجھدار‘ قرار دیتے ہوئے کہا کہ اس نے رپورٹر کو پولیس کے حوالے کردیا۔

مگر گاڑی سمجھدار نکلی،اُس نے سیلف ڈیفنس میں رپورٹر کو ہی لے جا کر پولیس کے حوالے کر دیا۔🤭

— Syeda Safina Malik (@SydaSafinaMalik) August 31, 2026

ایک صارف نے مزاحیہ تبصرہ کرتے ہوئے لکھا کہ مسئلہ گاڑی میں نہیں بلکہ پولیس وین میں تھا، ٹکر لگتے ہی ’نیٹ ورک‘ نے کام چھوڑ دیا اور گاڑی بے قابو ہوگئی۔

مسئلہ گاڑی میں نہیں تھا ۔ بلکہ پولیس گاڑی میں ٹیرککر لگا تھا ۔ جس کی وجہ سے نیٹ ورک نے کام چھوڑ دیا اور گاڑی بکابو وہی اور ٹا کر کے لگا ۔۔

— Arif Khan (@ArifKha28661574) August 31, 2026

کئی صارفین مزاحیہ انداز میں کہتے نظرا ٓئے کہ ویڈیو کا اگلہا حصہ جیل میں بنے گا تو کسی نے اس صورتحال کو پاکستان کے موجودہ حالات سے تشبیہہ دی۔