کینیڈا کے شمالی برٹش کولمبیا میں واقع وِلسٹن ذخیرۂ آب میں درختوں اور پودوں پر مشتمل ایک بڑا تیرتا جزیرہ اچانک نمودار ہونے کے بعد پراسرار طور پر غائب ہوگیا، جس نے مقامی افراد اور سائنسی حلقوں کو حیران کردیا۔
رپورٹ کے مطابق تقریباً 2 فٹبال میدانوں کے برابر رقبے کا یہ تیرتا جنگل ساحل سے الگ ہوکر وِلسٹن ذخیرۂ آب کے کھلے پانی میں پہنچ گیا تھا۔ مقامی کشتی بان کی جانب سے بنائی گئی تصاویر اور ویڈیوز منظر عام پر آنے کے بعد یہ واقعہ سوشل میڈیا پر بھی تیزی سے پھیل گیا۔
یہ بھی پڑھیں: چین کا ایک اور کارنامہ: مصنوعی جزیرے کی تیاری زور و شور سے جاری
برٹش کولمبیا ہائیڈرو کے مطابق مصنوعی سیاروں سے حاصل تصاویر میں 21 جولائی کو اس تیرتے جزیرے کی موجودگی کی تصدیق ہوئی، جس کا حجم تقریباً 70 بائی 140 میٹر تھا۔
برٹش کولمبیا ہائیڈرو کے ترجمان باب گیمر کے مطابق 2 ہفتے بعد حاصل کی گئی تازہ ترین مصنوعی سیاروں کی تصاویر میں تیرتے جزیرے کا کوئی نشان نہیں ملا۔ ادارے کے مطابق مزید تصاویر حاصل کی جائیں گی، تاہم موجودہ جائزے کے مطابق یہ جزیرہ ادارے کے آپریشنز کے لیے کوئی خطرہ نہیں تھا۔
‘According to estimates, it’s bigger than the size of a Canadian football field and nearly the size of two NFL fields’ https://t.co/zhFI83WOeu pic.twitter.com/AxulAa7qtW
— philip lewis (@Phil_Lewis_) August 30, 2026
برٹش کولمبیا ہائیڈرو نے وضاحت کی کہ شدید برفباری اور بارش کے باعث پانی کی سطح ریکارڈ حد تک بلند ہوگئی تھی، جس کے نتیجے میں ساحل سے پودوں اور بہہ کر جمع ہونے والی لکڑی کا ایک بڑا حصہ اکھڑ کر پانی پر تیرنے لگا۔ تیز ہواؤں نے اسے کھلے پانی کی جانب دھکیل دیا، تاہم 5 اگست تک یہ دوبارہ نظروں سے اوجھل ہوگیا۔
مقامی شہری راکی ایوری کو ایک کشتی بان نے تیرتے جنگل کی تصاویر اور ویڈیوز بھیجیں، جنہیں انہوں نے سماجی رابطے کی ویب سائٹ پر شیئر کیا۔ ایوری نے اسے اپنی زندگی کے حیران کن مناظر میں سے ایک قرار دیتے ہوئے کہا کہ ملک میں 40 سال گزارنے کے دوران انہوں نے ایسا منظر پہلے کبھی نہیں دیکھا۔
یہ بھی پڑھیں: برٹش کولمبیا سے گم شدہ چٹان 1700 میل دور کیلیفورنیا سے مل گئی
اس واقعے نے سوشل میڈیا پر مختلف قیاس آرائیوں کو بھی جنم دیا۔ بعض صارفین نے سوال اٹھایا کہ اگر جزیرہ پانی کے نیچے سے نمودار ہوا تو اس پر موجود درخت اتنے صحت مند اور مکمل کیسے ہوسکتے ہیں۔
ماہرین کے مطابق پودوں اور درختوں سے بنی ایسی بڑی تیرتی چٹائیاں یا گچھے پانی کے ذریعے طویل فاصلوں تک منتقل ہوسکتے ہیں اور بعض اوقات ان کے ساتھ جانوروں اور پودوں کی مختلف اقسام بھی ایک جگہ سے دوسری جگہ منتقل ہوجاتی ہیں۔
