چیئرمین پاکستان کرکٹ بورڈ (پی سی بی) سینیٹر محسن نقوی نے قومی ٹیم کی خراب کارکردگی پر افسوس کا اظہار کرتے ہوئے کہا ہے کہ وہ تنقید سے نہ پہلے گھبرائے ہیں اور نہ اب گھبراتے ہیں، تاہم کھلاڑیوں کی تذلیل برداشت نہیں کی جائے گی۔
نجی ٹی وی سے گفتگو کرتے ہوئے محسن نقوی کا کہنا تھا کہ انگلینڈ میں جو اقدامات کیے گئے وہ ضروری تھے، جبکہ کارکردگی کے علاوہ دیگر معاملات بھی موجود ہیں جنہیں فی الحال دیکھا جا رہا ہے۔
انہوں نے کہاکہ اس وقت کرکٹ کے علاوہ کسی دوسرے معاملے پر بات کرنے کا وقت نہیں۔
چیئرمین پی سی بی نے کہا کہ بلاجواز تنقید سے انہیں کوئی فرق نہیں پڑتا، خاص طور پر ان لوگوں کی باتوں کی جنہوں نے خود کچھ نہیں کیا۔
محسن نقوی کا کہنا تھا کہ اگر وسیم اکرم جیسے بڑے کھلاڑی کسی معاملے پر بات کریں تو وہ اسے سنجیدگی سے لیتے ہیں، تاہم جو لوگ یہ کہتے ہیں کہ وہ کرکٹ کو وقت نہیں دیتے، انہیں حقیقت کا علم نہیں۔
انہوں نے اعتراف کیا کہ ٹیسٹ کرکٹ میں پاکستان کی کارکردگی انتہائی خراب رہی ہے، تاہم کھلاڑیوں پر اعتماد برقرار رکھنے کی ضرورت ہے۔
چیئرمین پی سی بی نے واضح کیاکہ قومی کھلاڑیوں کی تذلیل کسی صورت برداشت نہیں کریں گے۔
