صدر مملکت آصف علی زرداری نے پاکستان اور انڈونیشیا کی بحری افواج کے درمیان تعلقات کے فروغ کے لیے خدمات کے اعتراف میں انڈونیشین بحریہ کے سربراہ ایڈمرل ڈاکٹر محمد علی کو نشان امتیاز (ملٹری) سے نواز دیا۔
ایوان صدر میں اعزاز دینے کی خصوصی تقریب منعقد ہوئی جس میں چیف آف نیول اسٹاف ایڈمرل نوید اشرف، سینیٹر سلیم مانڈوی والا، ارکان پارلیمنٹ اور سفارتی برادری کے نمائندوں نے شرکت کی۔
یہ بھی پڑھیں: فیلڈ مارشل عاصم منیر سے انڈونیشین بحریہ کے سربراہ کی ملاقات، تعاون مزید مضبوط بنانے کا عزم
ایوان صدر کے میڈیا ونگ کے مطابق ایڈمرل ڈاکٹر محمد علی نے صدر مملکت آصف علی زرداری سے ملاقات بھی کی۔ صدر نے انہیں نشان امتیاز (ملٹری) سے نوازے جانے پر مبارکباد دی۔
ملاقات کے دوران صدر مملکت نے کہا کہ پاکستان اور انڈونیشیا کے درمیان دیرینہ اور برادرانہ تعلقات قائم ہیں، دونوں ممالک کی بحری افواج کے درمیان تعاون کو مزید مضبوط بنانے کی ضرورت ہے۔
President confers Nishan-i-Imtiaz (Military) upon Chief of Indonesian Navy
President Asif Ali Zardari conferred Nishan-i-Imtiaz (Military) upon Admiral Dr. Muhammad Ali, Chief of the Indonesian Navy, recognising his contribution to the promotion of relations between the two… pic.twitter.com/gOWEWOIRyv
— The President of Pakistan (@PresOfPakistan) September 14, 2026
آصف علی زرداری نے کہا کہ بلیو اکانومی اور بحری شعبے کی باہمی ترقی میں بے پناہ صلاحیت موجود ہے، جسے بھرپور انداز میں بروئے کار لانے کی ضرورت ہے۔ انہوں نے پاکستان نیوی کی جانب سے منعقد کی جانے والی مشقوں میں انڈونیشین بحریہ کی باقاعدہ شرکت کو بھی سراہا، انڈونیشیا کے سفیر لیفٹیننٹ جنرل (ر) چندر ڈبلیو سوکوتجو بھی ایڈمرل ڈاکٹر محمد علی کے ہمراہ تھے۔
دریں اثنا انڈونیشین نیول چیف نے جی ایچ کیو میں فیلڈ مارشل سید عاصم منیر سے بھی ملاقات کی، جس میں باہمی دلچسپی کے امور، علاقائی سلامتی اور دوطرفہ دفاعی تعاون پر تبادلہ خیال کیا گیا۔
یہ بھی پڑھیں: پاک انڈونیشیا مشترکہ فوجی مشق شاہین اسٹرائیک II کامیابی سے مکمل
ملاقات میں دونوں ممالک کے درمیان عسکری تعلقات پر اطمینان کا اظہار کیا گیا اور پیشہ ورانہ تربیت، دفاعی اشتراک اور مشترکہ مشقوں کے شعبوں میں تعاون مزید بڑھانے کے عزم کا اعادہ کیا گیا۔
فریقین نے دونوں ممالک کی افواج کے درمیان موجودہ تعلقات کو مزید مستحکم بنانے اور دفاع و سلامتی کے شعبوں میں تعاون کو وسعت دینے پر بھی اتفاق کیا۔
فیلڈ مارشل سید عاصم منیر نے دفاع اور سلامتی کے شعبوں سمیت انڈونیشیا کے ساتھ دیرینہ اور برادرانہ تعلقات مزید مضبوط بنانے کے عزم کا اعادہ کیا۔
ایڈمرل ڈاکٹر محمد علی نے پاکستان کی مسلح افواج کی پیشہ ورانہ مہارت کو سراہتے ہوئے علاقائی امن و استحکام کے لیے ان کی خدمات کا اعتراف کیا۔
