پاکستان سے چوری کرکے بیرون ملک اسمگل کی گئے 36 قدیم نوادرات امریکا سے پاکستان کو واپس کردیے گئے ہیں، جنہیں اب وطن لایا جائے گا۔
نیویارک کاؤنٹی ڈسٹرکٹ اٹارنی کے دفتر میں اس حوالے سے تقریب ہوئی، جس میں نیویارک میں پاکستان کے قونصل جنرل عامر احمد اتوزئی نے نوادرات کی واپسی کے معاہدے پر دستخط کیے۔
CG @atozai signed an agreement with the NY County District Attorney’s office for the repatriation of 36 stolen artifacts to Pakistan, including a 4th-Century Yakshi figure and 35 ancient Terracotta figures on Sep 14, 2026. pic.twitter.com/8mQuBjjPNS
— Pakistan Consulate General New York (@PakinNewYork) September 15, 2026
واپس کی جانے والی نوادرات میں چوتھی صدی عیسوی سے تعلق رکھنے والی ’یکشی‘ کی گرے شِسٹ شکل بھی شامل ہے، جبکہ دیگر 35 نوادرات ٹیراکوٹا سے بنی زرخیزی کی علامتی اشکال ہیں، جن کا تعلق تقریباً 2700 سے 3000 قبل مسیح سے بتایا گیا ہے۔
پاکستانی قونصل جنرل نے کہا کہ چوری کیے گئے نوادرات کی قانونی واپسی سے ملک کے تاریخی اور ثقافتی ورثے کا تحفظ ممکن ہوگا اور آنے والی نسلوں کو اپنی تہذیبی تاریخ سے آگاہی کا موقع ملے گا۔
یہ بھی پڑھیں:اسکردو کا بدھا راک: حکومت کی نظروں سے اوجھل
امریکا سے پاکستانی نوادرات کی واپسی کا یہ سلسلہ اس سے پہلے بھی جاری رہا ہے۔ مین ہٹن ڈسٹرکٹ اٹارنی کے دفتر نے مئی 2025 میں پاکستان کی 39 نوادرات کی واپسی کا اعلان کیا تھا، جبکہ 2026 میں امریکی حکام کی جانب سے پاکستان کی سیکڑوں نوادرات کی واپسی کی اطلاعات بھی سامنے آ چکی ہیں۔
