دہشتگردی کے خلاف تعاون سے معاشی شراکت داری تک، پاک امریکا تعلقات میں نئے معاشی اور اسٹریٹجک دور کا آغاز

پاکستان اور امریکا کے باہمی تعلقات میں دہشتگردی کے خلاف تعاون سے معاشی شراکت داری تک، ایک نئے اسٹریٹجک دور کا آغاز ہوگیا ہے۔

پاک امریکا تعلقات روایتی محدود بنیادوں سے نکل کر اب ایک وسعت پذیر معاشی اور اسٹریٹجک شراکت داری میں ڈھل رہے ہیں۔ امریکا کی جانب سے عالمی سپلائی چین کی بحالی، تجارت، سرمایہ کاری، نایاب معدنیات، ٹیکنالوجی اور انسدادِ دہشتگردی پر بڑھتی ہوئی توجہ کے باعث دونوں ممالک کے درمیان کثیر الجہتی تعاون کے نئے اور مستحکم مواقع پیدا ہو رہے ہیں۔

پاکستان اور امریکا کے تعلقات اب محض روایتی امور تک محدود نہیں رہے بلکہ ان میں وسیع تر معاشی اور اسٹریٹجک پھیلاؤ واضح طور پر دیکھنے کو مل رہا ہے۔

دفترِ امریکی تجارتی نمائندہ (USTR) کے مطابق سال 2025 میں دونوں ممالک کے درمیان اشیاء اور خدمات کا کل دوطرفہ تجارتی حجم تقریباً 11.5 ارب ڈالر تک پہنچ گیا، جو کہ 2024 کے مقابلے میں 14 فیصد زیادہ ہے۔ اس حجم میں اشیاء کی تجارت 8.5 ارب ڈالر جبکہ خدمات کی تجارت تقریباً 2.9 ارب ڈالر رہی۔ امریکا نے پاکستان کو 3.1 ارب ڈالر کی برآمدات کیں، جبکہ پاکستان سے امریکا کو کی جانے والی برآمدات کا حجم 5.4 ارب ڈالر رہا۔

پاکستان کا جغرافیائی اور معاشی حجم

پاکستان کی 25 کروڑ 52 لاکھ کی آبادی اور 2025 میں 407.3 ارب ڈالر کے معاشی حجم نے اسے امریکی اشیاء، خدمات اور سرمایہ کاری کے لیے ایک اہم اور بڑی منڈی بنا دیا ہے۔ اس کا جغرافیائی موقعِ محل، جو جنوبی ایشیا کو وسطی ایشیا، مشرقِ وسطیٰ اور بحرِ ہند کے خطے سے جوڑتا ہے، دوطرفہ معاشی و اسٹریٹجک تعاون کو علاقائی اہمیت بھی فراہم کرتا ہے۔

ٹیکنالوجی اور ڈیجیٹل معیشت میں نیا تعاون

ٹیکنالوجی اور ڈیجیٹل معیشت دونوں ممالک کے درمیان تعاون کے ایک نئے شعبے کے طور پر ابھر رہی ہے۔ اسٹیٹ بنک آف پاکستان کے مطابق مالی سال 2025 کے دوران آئی سی ٹی (ICT) خدمات کی برآمدات 18.3 فیصد اضافے کے ساتھ 3.8 ارب ڈالر تک پہنچ گئیں، جو سافٹ ویئر اور آئی ٹی کی بڑھتی ہوئی صلاحیت کی عکاسی کرتی ہیں۔ یہ پیشرفت ٹیکنالوجی، ڈیجیٹل سروسز، بی ٹو بی (B2B) سرمایہ کاری اور جدت طرازی میں باہمی تعاون کا راستہ ہموار کر رہی ہے۔

نایاب معدنیات: شراکت داری کا نیا افق

پاکستان میں تانبے، سونے، لوہے، کوئلے اور کرومائٹ کے وسیع ذخائر موجود ہیں۔ اسٹیٹ بنک کے اعداد و شمار کے مطابق پاکستان میں 6.1 ارب ٹن تانبہ، 1.427 ارب ٹن لوہا اور 186 ارب ٹن کوئلہ موجود ہے۔ امریکا کی جانب سے نایاب معدنیات کی سپلائی چین کو تنوع دینے کی پالیسی کے تحت پاکستان ان معدنیات کی دریافت، پروسیسنگ اور ٹیکنالوجی کی منتقلی کے لیے ایک اہم ترین شراکت دار بن سکتا ہے۔ فروری 2026 میں امریکا نے نایاب معدنیات کی عالمی تجارتی پالیسی پر کام کا آغاز کیا تھا جس میں پاکستان کا کردار اہم ہو سکتا ہے۔

سیکیورٹی اور انسدادِ دہشتگردی میں تعاون

سیکیورٹی تعاون پاک امریکا تعلقات کا ایک مضبوط ستون ہے۔ پاکستان نے دہشتگردی کے خلاف جنگ میں 90,000 سے زائد جانی قربانیاں دیں اور 150 ارب ڈالر سے زائد کا معاشی نقصان اٹھایا۔

دوسری جانب پاکستان نے عالمی سیکیورٹی کے حوالے سے بھی اہم پیشرفت کی، جیسا کہ مارچ 2025 میں داعش (داعش خراسان) کے اہم اہلکار محمد شریف اللہ کو گرفتار کر کے امریکا کے حوالے کیا گیا۔ اگست 2026 میں ہونے والے ‘پاک امریکا کاؤنٹر ٹیررازم ڈائیلاگ’ میں سرحدی سیکیورٹی اور کالعدم تنظیموں (داعش، القاعدہ، ٹی ٹی پی، بی ایل اے) کے خلاف مشترکہ اقدامات پر غور کیا گیا۔

سفارتی و ادارہ جاتی تحرک

سال 2026 کے دوران دونوں ممالک کے تعلقات میں نمایاں سفارتی سرگرمی دیکھی گئی۔ فروری 2026 میں وزیراعظم شہباز شریف اور امریکی وزیرِ خارجہ مارکو روبیو کے درمیان تجارتی و معاشی تعاون پر اتفاق ہوا۔ بعد ازاں مئی میں نائب وزیراعظم و وزیرِ خارجہ اسحاق ڈار کی امریکی وزیرِ خارجہ سے ملاقات میں تجارتی، ثقافتی اور سیکیورٹی تعلقات کو مزید مضبوط بنانے پر زور دیا گیا، جہاں امریکی حکام نے پاکستان کی سفارتی اور مصالحتی کوششوں کو سراہا۔

علاقائی استحکام اور دوطرفہ تعلقات کا مستقبل

پاکستان نے مشرقِ وسطیٰ اور خطے کی دیگر کشیدگیوں کو کم کرنے کے لیے امریکا، ایران اور خلیجی ممالک کے درمیان مؤثر سفارتی کردار ادا کیا ہے جسے واشنگٹن میں بھی تسلیم کیا گیا۔ تعلیمی اور عوامی سطح کے رابطے اس شراکت داری کو مزید پائیداری فراہم کر رہے ہیں۔ مجموعی طور پر، پاک امریکا تعلقات اب ایک نئے مرحلے میں داخل ہو چکے ہیں جہاں تجارت، توانائی، معدنیات، ٹیکنالوجی اور علاقائی سفارت کاری باہم مل کر دوطرفہ تعاون کو مستحکم بنیادیں فراہم کر رہے ہیں۔