پاکستان اور فرانس کے جوائنٹ سیکیورٹی کمیشن کا 8واں دور 22 ستمبر 2026 کو اسلام آباد میں منعقد ہوا جس میں سیکیورٹی اور دفاعی تعاون سے متعلق امور پر اعلیٰ سطح کی گفتگو کی گئی۔
یہ بھی پڑھیں: پاکستان کا کینیڈا، فرانس، برطانیہ سمیت 13 ممالک کے 2 ریاستی حل کی حمایت کا خیرمقدم
پاکستانی وفد کی قیادت فیڈرل سیکرٹری برائے دفاع لیفٹیننٹ جنرل (ریٹائرڈ) محمد علی نے کی، جبکہ فرانسیسی وفد کی قیادت سیکرٹری جنرل برائے دفاع و قومی سلامتی مسٹر نکولس روشے نے کی۔
دوطرفہ تعلقات اور سابقہ فیصلوں کا جائزہ
اجلاس کے دوران سال 2022 میں پیرس میں منعقد ہونے والے جوائنٹ سیکیورٹی کمیشن کے 7ویں دور کے فیصلے اور پیشرفت کا جائزہ لیا گیا۔
دفاعی تعاون کے روڈ میپ کی توثیق: دونوں فریقین نے پاکستان-فرانس روڈ میپ برائے دوطرفہ تعاون (2023ء) کے تحت تعاون کو مزید مضبوط بنانے اور اس پر عملدرآمد جاری رکھنے کے عزم کا اعادہ کیا۔ اس سلسلے میں اگلے ‘اسٹاف ٹاکس’ دفاعی تعاون کا جائزہ لینے اور باہمی مکالمے کو آگے بڑھانے کے لیے اہم ثابت ہوں گے۔
علاقائی سیکیورٹی اور انسداد دہشتگردی
دونوں وفود نے علاقائی سیکیورٹی صورتحال پر خیالات کا تبادلہ کیا اور ابھرتے ہوئے سیکیورٹی چیلنجز سے نمٹنے کے لیے سفارت کاری اور مذاکرات کی اہمیت پر زور دیا۔ اس کے علاوہ دہشتگردی، منشیات کی اسمگلنگ، سمندری قزاقی (پائریسی) اور دیگر منظم بین الاقوامی جرائم سے نمٹنے کے لیے باہمی تعاون بڑھانے پر اتفاق کیا گیا۔
جوائنٹ سیکیورٹی کمیشن کا میکانزم
ترجمان کے مطابق پاکستان-فرانس جوائنٹ سیکیورٹی کمیشن باہمی دلچسپی کے سیکیورٹی و دفاعی امور پر مشاورت کا ایک ادارہ جاتی نظام ہے جو باقاعدہ رابطوں کے لیے اہم پلیٹ فارم فراہم کرتا ہے۔
اجلاس کے اختتام پر فیصلہ کیا گیا کہ اس میکانزم کا اگلا (9واں) دور باہمی متفقہ تاریخوں پر فرانس میں منعقد کیا جائے گا۔
