وزیراعظم محمد شہباز شریف نے گیٹس فاؤنڈیشن کے چیئرمین بل گیٹس سے ملاقات کی، جس میں پاکستان میں پولیو کے خاتمے، صحت، زراعت، ڈیجیٹلائزیشن اور مصنوعی ذہانت سمیت مختلف شعبوں میں تعاون پر تبادلہ خیال کیا گیا۔
وزیراعظم نے رواں ماہ کے اوائل میں گیٹس فاؤنڈیشن کی ٹیم کے دورۂ پاکستان کا ذکر کرتے ہوئے پولیو کے خاتمے، ماں و بچے کی صحت، غذائیت، حفاظتی ٹیکہ جات، ڈیجیٹلائزیشن اور مالیاتی شمولیت کے شعبوں میں فاؤنڈیشن کے تعاون کو سراہا۔
مزید پڑھیں:بل اینڈ ملینڈا گیٹس فاؤنڈیشن کا خواتین کی صحت کے لیے 2.5 ارب ڈالر امداد کا اعلان
وزیراعظم شہباز شریف نے پاکستان سے پولیو کے مکمل خاتمے کے لیے حکومت کے غیر متزلزل عزم کا اعادہ کرتے ہوئے اس مقصد کے لیے گیٹس فاؤنڈیشن کی طویل عرصے سے جاری معاونت پر بل گیٹس کا شکریہ ادا کیا۔ انہوں نے پولیو کے مکمل خاتمے کے لیے اپنے ذاتی عزم کا بھی اظہار کیا۔
بل گیٹس نے وزیراعظم کی قیادت میں پاکستان کی پولیو کے خاتمے کی کوششوں کو سراہتے ہوئے کہا کہ آئندہ نسلوں کو اس موذی مرض سے محفوظ رکھنے کے لیے اس کا مکمل خاتمہ انتہائی اہم ہے۔ انہوں نے ملک بھر میں پولیو ویکسینیشن پروگرام کے لیے صوبائی حکومتوں کو وزیراعظم کی جانب سے فراہم کردہ ذاتی رہنمائی کی بھی تعریف کی۔
وزیراعظم محمد شہباز شریف کی نیویارک میں گیٹس فاؤنڈیشن کے چیئرمین بل گیٹس سے ملاقات۔
گیٹس فاؤنڈیشن ٹیم کے دورۂ پاکستان اور پولیو کے خاتمے، ماں و بچے کی صحت، غذائیت، حفاظتی ٹیکہ جات، ڈیجیٹلائزیشن اور مالیاتی شمولیت کے شعبوں میں تعاون کو سراہا۔@AmirSaeedAbbasi @HussainAhmedCh8 pic.twitter.com/1fBAQekAUE— Media Talk (@mediatalk922) September 23, 2026
ملاقات میں پاکستان کی سماجی و اقتصادی ترقی میں گیٹس فاؤنڈیشن کے کردار اور صحت عامہ، زراعت، ڈیجیٹل جدت اور مصنوعی ذہانت سمیت مختلف شعبوں میں تعاون مزید وسعت دینے پر بھی گفتگو ہوئی۔
وزیراعظم نے بل گیٹس کو زرعی شعبے میں حکومتی اصلاحات سے آگاہ کیا، جن میں جدت، بایوٹیکنالوجی، موسمیاتی تبدیلی سے مطابقت، تحقیق اور کسانوں کی استعداد کار بڑھانے پر توجہ دی جا رہی ہے۔
مزید پڑھیں:بل گیٹس کی سابقہ اہلیہ کا گیٹس فاؤنڈیشن چھوڑ کر الگ ادارہ قائم کرنے کا اعلان
دونوں رہنماؤں نے بہتر بیجوں کی تیاری، مویشیوں کی جینیاتی بہتری اور ابھرتی ہوئی زرعی ٹیکنالوجیز کے شعبوں میں تعاون کے امکانات تلاش کرنے پر اتفاق کیا۔
ملاقات کے اختتام پر پاکستان کی پائیدار ترقی، تکنیکی پیش رفت اور سماجی شعبوں میں بہتری کے لیے شراکت داری مزید مضبوط بنانے کے عزم کا اعادہ کیا گیا۔ وزیراعظم نے بل گیٹس کو جلد پاکستان کا دورہ کرنے کی دعوت بھی دی۔
