ڈی آئی جی اسلام آباد علی وسیم نے ٹریفک قوانین کی معمولی خلاف ورزیوں پر شہریوں کے خلاف سخت قانونی کارروائیوں اور بلاوجہ پرچوں کے اندراج کو روکنے کے لیے اہم اقدام اٹھایا ہے۔
ترجمان اسلام آباد پولیس کے مطابق ڈی آئی جی نے ہدایت کی ہے کہ ٹریفک کی خلاف ورزی کرنے والوں کے خلاف دفعہ 279 ت پ کے تحت غیر ضروری مقدمات درج نہ کیے جائیں۔
ڈی آئی جی اسلام آباد علی وسیم کا کہنا تھا کہ ٹریفک قوانین کی خلاف ورزی کی صورت میں شہریوں کو قانون کے مطابق چالان یا جرمانہ کیا جائے، تاہم افسران شہریوں کے خلاف غیر ضروری مقدمات قائم کرنے سے مکمل گریز کریں۔
انہوں نے ٹریفک افسران کو خصوصی ہدایات جاری کرتے ہوئے کہا کہ دورانِ ڈیوٹی شہریوں کے ساتھ خوش اخلاقی، شائستگی اور ذمہ دارانہ رویہ اختیار کیا جائے۔
علی وسیم نے شہریوں سے بھی اپیل کی کہ وہ ٹریفک قوانین کی مکمل پاسداری کریں اور خلاف ورزیوں سے اجتناب کریں، کیونکہ قوانین پر عملدرآمد ہی محفوظ اور پُرامن سفری ماحول کی ضمانت ہے۔
انہوں نے کہا کہ شہر میں ٹریفک کی روانی کو برقرار رکھنے کے لیے شہری اسلام آباد ٹریفک پولیس کے ساتھ بھرپور تعاون کریں۔
