امریکی صدر ڈونلڈ ٹرمپ نے ریاست اوہائیو میں انتخابی ریلی کے دوران ویمنز نیشنل باسکٹ بال ایسوسی ایشن کی کھلاڑی صوفی کننگھم کی خوبصورتی کی تعریف کرتے ہوئے مذاقاً کہا کہ آج کے دور میں کسی خاتون کو خوبصورت کہنا سیاستدان کے سیاسی کیریئر کے خاتمے کا سبب بن سکتا ہے۔
ٹرمپ نے پیر کو ینگس ٹاؤن، اوہائیو کے کووِیلی سینٹر میں ری پبلکن امیدواروں کی حمایت میں منعقدہ ریلی سے خطاب کرتے ہوئے انڈیانا فیور کی کھلاڑی صوفی کننگھم کا ذکر کیا۔
یہ بھی پڑھیں: ٹینس کی ملکہ پھر میدان میں، سرینا ولیمز کی واپسی پر شائقین پُرجوش
ٹرمپ نے کہا کہ بہت سے مرد صوفی کننگھم کو کھیلتا دیکھنے کے لیے میچ دیکھنے آئیں گے کیونکہ وہ خوبصورت ہیں، لیکن اب سیاستدانوں کو ایسی بات کہنے کی اجازت نہیں رہی۔
امریکی صدر نے اپنی بات جاری رکھتے ہوئے کہا کہ انہیں یہ کہنے پر معذرت کرنا پڑسکتی ہے، کیونکہ جدید سیاسی ماحول میں جب بھی کوئی سیاستدان کسی خاتون کو خوبصورت قرار دیتا ہے تو عموماً اس کے سیاسی کیریئر کے خاتمے کا وقت آجاتا ہے۔
View this post on Instagram
ٹرمپ نے مزید کہا کہ صوفی کننگھم ایک خوبصورت نوجوان خاتون ہیں اور ان کی ٹیم میں موجودگی پوائنٹس بنانے کے بجائے شائقین کی تعداد بڑھانے میں مدد دے سکتی ہے۔ ان کے اس تبصرے پر ریلی میں موجود افراد نے ہنسی اور تالیاں بجا کر ردعمل دیا۔
صوفی کننگھم کی مقبولیت کی وجہ
30 سالہ صوفی کننگھم انڈیانا فیور کی اہم کھلاڑیوں میں شامل ہیں۔ وہ خواتین کے کھیلوں میں ٹرانس جینڈر کھلاڑیوں کی شمولیت کے معاملے پر اپنے مؤقف کے باعث بھی خبروں میں رہی ہیں۔ انہوں نے خواتین کے کھیلوں اور لاکر رومز کے تحفظ کی حمایت کی ہے، جس کے باعث انہیں حمایت اور تنقید دونوں کا سامنا کرنا پڑا۔
یہ بھی پڑھیں: غصے میں کھیلا گیا ایک شاٹ ٹینس اسٹار کو بھاری پڑ گیا، لاکھوں ڈالر اور اے ٹی پی فائنلز داؤ پر لگ گئے
2026 کے سیزن میں صوفی کننگھم نے فی میچ اوسطاً 7.9 پوائنٹس بنائے۔ ان کا موجودہ معاہدہ سیزن کے اختتام پر ختم ہوگیا ہے اور وہ آئندہ سیزن کے لیے فری ایجنٹ ہیں۔
ٹرمپ کے تبصروں کے بعد سوشل میڈیا پر ملے جلے ردعمل سامنے آئے۔ بعض صارفین نے ان کے بیان کو نامناسب اور پرانے انداز کی سوچ قرار دیا، جبکہ دوسروں نے اسے ایک مقبول کھلاڑی کی ہلکے پھلکے انداز میں تعریف قرار دیا۔
