صدر مملکت آصف علی زرداری 22 سے 24 اکتوبر 2026 تک جرمنی کا سرکاری دورہ کریں گے۔ دفتر خارجہ کے ترجمان کے مطابق دورے کے دوران صدر مملکت جرمنی کے صدر، اعلیٰ قیادت اور کاروباری شخصیات سے ملاقاتیں کریں گے۔
ملاقاتوں میں پاکستان اور جرمنی کے دوطرفہ تعلقات کا جائزہ لیا جائے گا، جبکہ اقتصادی اور تجارتی تعاون کے فروغ پر خصوصی توجہ دی جائے گی۔ اس موقع پر دونوں ممالک کے درمیان کاروباری روابط اور باہمی شراکت داری کو مزید مضبوط بنانے کے امور بھی زیر بحث آئیں گے۔
دفتر خارجہ کے مطابق صدر مملکت کا دورہ پاکستان اور جرمنی کے درمیان اعلیٰ سطح کے تبادلوں کا حصہ ہے اور رواں سال دونوں ممالک کے درمیان سفارتی تعلقات کے قیام کی 75ویں سالگرہ کے تناظر میں خصوصی اہمیت رکھتا ہے۔
ترجمان دفتر خارجہ کا کہنا ہے کہ یہ دورہ دونوں ممالک کے اس عزم کا عکاس ہے کہ وہ باہمی شراکت داری کو مزید مستحکم بنانے اور مختلف شعبوں میں تعاون کو وسعت دینے کے لیے مل کر کام کریں گے۔
