سابق وزیراعلیٰ خیبر پختونخوا پرویز خٹک نے وزیراعظم شہباز شریف کے بی آر ٹی پشاور سے متعلق بیان کو حقائق کے برعکس قرار دیتے ہوئے کہا ہے کہ منصوبے پر کرپشن کے الزامات بے بنیاد ہیں اور وہ اس حوالے سے قانونی کارروائی کا حق محفوظ رکھتے ہیں۔
میڈیا کو جاری کیے گئے ایک بیان میں پرویز خٹک نے کہا کہ وہ بی آر ٹی پشاور کا معاملہ وزیراعظم کے سامنے وفاقی کابینہ کے اجلاس میں بھی اٹھائیں گے۔ ان کے مطابق منصوبے میں کرپشن کا کوئی معاملہ نہیں تھا، بلکہ نیب کے اعتراضات تکنیکی ڈیزائن سے متعلق تھے، جنہیں دور کیا جا چکا ہے۔
سابق وزیراعلیٰ نے وضاحت کرتے ہوئے کہا کہ بی آر ٹی منصوبے سے متعلق نیب میں بھی معاملہ ختم ہو چکا ہے، جبکہ پشاور ہائیکورٹ میں بھی کیس ختم ہو چکا ہے اور منصوبے کو شفاف قرار دیا گیا تھا۔
پرویز خٹک نے کہا کہ وزیراعظم شہباز شریف کا بی آر ٹی سے متعلق بیان حقائق کے برعکس ہے اور وہ اس معاملے پر وفاقی کابینہ کے اجلاس میں اپنا مؤقف پیش کریں گے۔
انہوں نے مزید کہا کہ اگر اس کے باوجود کسی نے بی آر ٹی پشاور کے حوالے سے کرپشن کے الزامات عائد کیے تو وہ متعلقہ افراد کے خلاف قانونی کارروائی کرنے کا حق محفوظ رکھتے ہیں
