بھارتی ریاست مہاراشٹر میں ڈاکوؤں کے ایک گروہ نے مبینہ طور پر ریلوے سگنل سسٹم میں چھیڑ چھاڑ کرکے ممبئی سے کولہاپور جانے والی مہالکشمی ایکسپریس کو روک لیا اور 3 خواتین مسافروں سے تقریباً 2 لاکھ بھارتی روپے مالیت کے طلائی زیورات لوٹ کر فرار ہوگئے۔
پولیس کے مطابق واردات اتوار کی رات تقریباً ڈھائی بجے ضلع ستارا میں سالپا ریلوے اسٹیشن کے قریب پیش آئی۔ ملزمان نے مبینہ طور پر سگنل سسٹم میں ردوبدل کرکے ٹرین کو روکا جس کے بعد 8 سے 10 افراد پر مشتمل گروہ ایس ٹو کوچ میں داخل ہوا اور تین خواتین سے طلائی زیورات چھین لیے۔
یہ بھی پڑھیں: لاہور: محبوبہ کے کہنے پر اپنے ہی گھر سے 70 تولے سونا چوری کرلیا
واردات کے بعد ملزمان نے تعاقب سے بچنے کے لیے ایس ٹو، ایس تھری اور ایس فور کوچز پر پتھراؤ بھی کیا جس سے ٹرین میں سوار مسافروں میں خوف و ہراس پھیل گیا۔
میرج ریلوے پولیس اسٹیشن کے انسپکٹر سیتارام کے مطابق ابتدائی تحقیقات سے شبہ ہے کہ ملزمان نے منصوبہ بندی کے تحت مختلف گروپوں میں تقسیم ہوکر واردات کی۔ بعض افراد ریلوے سگنل سسٹم کے قریب موجود تھے جبکہ دیگر نے ٹرین میں داخل ہوکر مسافروں کو لوٹا۔
یہ بھی پڑھیں: بگاٹی کے سی ای او کی کروڑوں روپے مالیت کی گاڑی چوری، مالک نے چور کو کیسے ڈھونڈ نکالا؟
واقعے کے وقت مسافروں کی حفاظت کے لیے ٹرین میں ریلوے پروٹیکشن فورس (آر پی ایف) کے 3 اہلکار بھی تعینات تھے تاہم ملزمان واردات کے بعد فرار ہونے میں کامیاب ہوگئے۔
