پاکستان کی عسکری قیادت نے ترکیہ میں ہولناک زلزلے سے ہونے والی تباہی پر افسوس کا اظہار کیا ہے۔ آرمی چیف کی ہدایت پر پاک فوج کے دو دستے ترکیہ روانہ ہوگئے جن میں ڈاکٹرز، پیرا میڈیکل اسٹاف اور سرچ اینڈ ریسکیو ٹیمیں شامل ہیں۔ پاک فوج کی جانب سے امدادی سامان بھی ترکیہ بھیجا گیا ہے۔
ترکیہ میں پیر کی صبح 4 بجکر 17 منٹ پر آنے والے زلزلے نے ہر طرف تباہی مچادی ۔۔ چیئرمین جوائنٹ چیفس آف سٹاف کمیٹی جنرل ساحر شمشاد مرزا سمیت تینوں مسلح افواج کے سربراہان نے ترکیہ میں زلزلہ زدگان سے گہری ہمدردی کا اظہار کیا ہے۔
آرمی چیف جنرل عاصم منیر کی ہدایت پر پاک فوج کے دو دستے ترکیہ روانہ کردیئے گئے ہیں۔ امدادی دستوں میں اربن سرچ اینڈ ریسکیو ٹیم ، سراغ رساں کتے، جدید آلات شامل ہیں۔
آرمی ڈاکٹرز، نرسنگ سٹاف اور ٹیکنیشنز پر مشتمل میڈیکل ٹیم بھی ترکیہ روانہ کی گئی ہے۔ امدادی سامان میں خیمے، کمبل اور دیگر اشیاء بھیجی گئی ہیں۔زلزلہ زدگان کے لیے 30 بستروں پر مشتمل موبائل ہسپتال بھی بھیجا گیا ہے ۔
آئی ایس پی آر کا کہنا تھا امدادی دستے گزشتہ رات پاک فضائیہ کے خصوصی طیارے سے ترکیہ روانہ ہوئے ۔ امدادی سرگرمیاں ترک حکومت، مسلح افواج، سفارتخانہ اسلام آباد سے قریبی رابطے سے آگے بڑھائی جا رہی ہیں، پاکستانی معاون دستے زلزلہ زدہ علاقوں میں انسانی جانوں کے بچاؤ اور امدادی کاموں کی تکمیل تک موجود رہیں گے۔ ۔پاکستانی عوام اور مسلح افواج ضرورت کی اس گھڑی میں ترک بھائیوں کو ہر ممکن مدد فراہم کریں گے۔
