واٹس ایپ نے صارفین کی سہولت کے لیے نیا فیچر متعارف کرا دیا ہے، جس کے ذریعے پیغامات میں موجود فون نمبرز پر کلک کرکے کال یا نمبر محفوظ کیا جاسکے گا، تاریخ اور وقت کو کیلنڈر میں شامل کیا جاسکے گا، جبکہ کسی پتے کو براہ راست نقشے میں کھولنے کی سہولت بھی ملے گی۔
نئے فیچر کو ‘میسج ٹیکسٹ ایکشنز’ کا نام دیا گیا ہے، جو واٹس ایپ پیغامات میں موجود فون نمبرز، تاریخوں، اوقات، پتے اور ای میل ایڈریسز کی خودکار طور پر شناخت کرے گا۔ ایسی معلومات کے نیچے نقطوں کی لکیر ظاہر ہوگی، جس پر کلک کرنے سے متعلقہ اختیارات سامنے آجائیں گے۔
یہ بھی پڑھیں: غیر فعال سموں سے منسلک واٹس ایپ اکاؤنٹس کو بند کرنے کا عمل شروع، صارفین کو خبردار کردیا گیا
ٹیکنالوجی ویب سائٹ ‘ڈبلیو اے بیٹا انفو’ کے مطابق یہ سہولت موصول ہونے اور بھیجے جانے والے دونوں طرح کے پیغامات میں کام کرے گی۔
فون نمبر پر کلک کرنے سے صارف اسے نقل کرنے، رابطوں میں محفوظ کرنے یا موبائل نیٹ ورک کے ذریعے کال کرنے کا انتخاب کرسکیں گے۔ کاروباری نمبرز کی صورت میں اضافی معلومات بھی ظاہر ہوسکتی ہیں۔
اسی طرح پیغام میں کسی تاریخ یا وقت کا ذکر ہونے پر اسے نقل کرنے، موبائل کیلنڈر میں شامل کرنے یا واٹس ایپ کے اندر ہی تقریب ترتیب دینے کا اختیار ملے گا۔
یہ بھی پڑھیں:واٹس ایپ اکاؤنٹس ہیک کرکے شہریوں سے رقم بٹورنے کے واقعات میں اضافہ
اگر کسی پیغام میں کوئی پتا درج ہو تو صارف اسے نقل کرنے یا نقشے کی ایپلی کیشن میں کھول کر مقام تک پہنچنے کے لیے استعمال کرسکیں گے۔ ای میل ایڈریس پر کلک کرنے سے اسے نقل کرنے یا موبائل کی ای میل ایپلی کیشن میں کھولنے کی سہولت بھی دستیاب ہوگی۔
واٹس ایپ صارفین کو ان تجاویز کے بارے میں اپنی رائے دینے کا اختیار بھی دے گا، جس کے ذریعے وہ بتا سکیں گے کہ دکھائے گئے اختیارات مفید ہیں یا نہیں۔ اگر ایپ کسی متن کی غلط شناخت کرے یا غیر ضروری سہولت تجویز کرے تو صارف اس کی نشاندہی بھی کرسکیں گے۔
رازداری اور فیچر کی دستیابی
واٹس ایپ کے مطابق نئے فیچر میں پیغامات کے متن کی جانچ صارف کے اپنے موبائل فون پر ہی کی جاتی ہے اور اس مقصد کے لیے پیغامات کا مواد یا شناخت کی گئی معلومات کمپنی کے سرورز پر نہیں بھیجی جاتیں، اس لیے پیغامات کی اینڈ ٹو اینڈ انکرپشن بھی برقرار رہتی ہے۔
یہ بھی پڑھیں: واٹس ایپ گروپس کے ذریعے بچوں کے استحصال کی ویڈیوز فروخت کرنے کا انکشاف، 2 ملزمان گرفتار
یہ فیچر فی الحال اینڈرائیڈ اور آئی او ایس کے تازہ ترین نسخے استعمال کرنے والے بعض صارفین کو مرحلہ وار فراہم کیا جا رہا ہے۔ کمپنی نے تمام صارفین کے لیے اس کے اجرا کی حتمی تاریخ کا اعلان نہیں کیا، تاہم آنے والے ہفتوں میں مزید صارفین کو یہ سہولت ملنے کی توقع ہے۔
