بھارتی شہر بنگلورو میں قتل کی ایک انتہائی لرزہ خیز واردات سامنے آئی ہے جہاں ایک ٹیکسی ڈرائیور نے مبینہ طور پر اپنی بیوی سمیت خاندان کے 7 افراد کو قتل کرنے کا اعتراف کیا ہے۔ پولیس نے اب تک ایک 7 سالہ بچے کی لاش برآمد کی ہے جبکہ دیگر 6 افراد کی لاشوں کی تلاش جاری ہے۔
بھارتی میڈیا رپورٹس کے مطابق پولیس نے ملزم کی شناخت اندوشیکھر کے نام سے کی ہے جس پر الزام ہے کہ اس نے پہلے اپنی بیوی سونیتا کو قتل کیا، جس کے بعد اپنے دو سالوں شیوکمار اور شنکر کو ان کے اہلِ خانہ سمیت دعوت پر بلایا اور انہیں بھی موت کے گھاٹ اتار دیا۔
یہ بھی پڑھیں: گوجرانوالہ: دُلہن کو ولیمہ کے روز قتل کرنے والا اپنے ہی ساتھیوں کی فائرنگ سے ہلاک، سی سی ڈی کا دعویٰ
قتل ہونے والوں میں ملزم کی ساس، دونوں سالوں کی بیویاں جبکہ شنکر کا 7 سالہ بیٹا بھی شامل ہے۔ پولیس کو شبہ ہے کہ ملزم نے قتل کے لیے پتھر کی بھاری سل استعمال کی۔ واردات کے بعد اس نے مبینہ طور پر لاشوں کو اپنی گاڑی میں مختلف مقامات پر منتقل کیا جبکہ جائے وقوعہ سے خون کے نشانات مٹانے اور شواہد ختم کرنے کے لیے کیمیکل کا استعمال بھی کیا۔
پولیس حکام کے مطابق قتل کے واقعات کی درست ترتیب اور دیگر تفصیلات کی تصدیق کے لیے تفتیش جاری ہے۔ ابتدائی تحقیقات کے مطابق اس لرزہ خیز واردات کے پیچھے گھریلو تنازع کو ممکنہ وجہ قرار دیا جا رہا ہے۔ پولیس کا کہنا ہے کہ ملزم کو اپنی بیوی کے میکے والوں سے مسلسل رابطے رکھنے پر اعتراض تھا جس کے باعث دونوں کے درمیان اختلافات پیدا ہوئے۔
یہ بھی پڑھیں: کراچی میں ٹک ٹاک استعمال کرنے پر بھائی کے ہاتھوں 2 بہنیں قتل
تفتیش کاروں کے مطابق یہی تنازع مبینہ طور پر قتل کی وارداتوں کا سبب بنا، تاہم حتمی محرکات جاننے کے لیے ملزم سے مزید پوچھ گچھ کی جا رہی ہے۔
یہ معاملہ سری رام پورہ پولیس اسٹیشن میں گمشدگی کی شکایت درج ہونے کے بعد سامنے آیا۔ پولیس کے مطابق دورانِ تفتیش ملزم نے متضاد بیانات دیے، جس کے بعد اس نے مبینہ طور پر سات افراد کے قتل کا اعتراف کیا۔
یہ بھی پڑھیں: گلگت بلتستان: اسکردو میں پسند کی شادی کرنے والا جوڑا 2 بچوں سمیت قتل، پورے خاندان کو گھر میں گلا کاٹ کر قتل کیا گیا
بعد ازاں پولیس نے تقریباً چار گھنٹے کی تلاش کے بعد نندی ہلز کے قریب سے 7 سالہ پونیتھ کی لاش برآمد کر لی۔ پولیس حکام کے مطابق باقی 6 افراد کی لاشوں کی تلاش جاری ہے جبکہ ملزم سے مزید تفتیش کے ذریعے قتل کے واقعات کی مکمل تفصیلات اور شواہد اکٹھے کیے جا رہے ہیں۔
