پاکستان میں اسپاٹی فائی صارفین کا طویل انتظار ختم: آڈیو بکس کا فیچر باقاعدہ متعارف، ایک لاکھ سے زائد کتب دستیاب

موسیقی اور سمعی مواد کی دنیا کے سب سے بڑے سٹریمنگ پلیٹ فارم اسپاٹی فائى (Spotify) نے پاکستانی صارفین کے طویل انتظار کو ختم کرتے ہوئے ملک میں آڈیو بکس کا فیچر متعارف کرا دیا ہے۔

اسپاٹی فائى کی جانب سے رواں ہفتے جاری کردہ اس نئے فیچر کے ذریعے فری اور پریمیئم، دونوں طرح کے صارفین کو ‘آڈیو بکس پلس’ (Audiobooks+) کی بدولت اپنے عالمی انگریزی کیٹلاگ سے 100,000 سے زائد کتب تک رسائی دی گئی ہے۔ صارفین اب اسپاٹی فائى ایپ میں موجود ‘Audiobooks’ کے الگ ٹیب پر جا کر اپنی پسندیدہ کتب تلاش اور سن سکتے ہیں۔

قیمت اور سٹریمنگ کی حد

کمپنی کی جانب سے جاری پریس ریلیز کے مطابق، اس سہولت سے استفادہ کرنے کے لیے صارفین کو 489 روپے ماہانہ ایڈ آن (Add-on) سبسکرپشن حاصل کرنا ہوگی، جس میں 15 گھنٹے آڈیو بکس سننے کی اجازت ہوگی۔ اگر یہ وقت مقررہ مدت سے پہلے ختم ہو جائے تو 579 روپے کی اضافے کی ادائیگی (Top-up) کر کے مزید 10 گھنٹے کا وقت خریدا جا سکتا ہے۔

کمپنی نے  وضاحت کی ہے کہ صرف وہی وقت ماہانہ کوٹے میں سے شمار ہوگا جو صارف حقیقت میں سنے گا، اور یہ کوٹہ ہر بلنگ سائیکل کے ساتھ خود بخود ری سیٹ ہو جائے گا۔ اس کے علاوہ اگر کوئی صارف کتاب کو ماہانہ سبسکرپشن پر سننے کے بجائے مستقل طور پر خریدنا چاہے، تو انفرادی سطح پر کتاب کی خریداری کا اختیار بھی موجود ہے۔

جدید اور نمایاں خصوصیات

پاکستانی صارفین کو دی جانے والی سہولیات میں خودکار بک مارکنگ، سلیپ ٹائمر، اور آف لائن سننے کے لیے کتابیں ڈاؤن لوڈ کرنے کی سہولت شامل ہے۔ اس کے ساتھ ساتھ ‘پیج میچ’  کا ایک منفرد فیچر بھی شامل کیا گیا ہے، جس کے تحت صارف اپنی زیرِ مطالعہ کاغذی یا ای بک اور اس کے آڈیو ورژن کے درمیان آسانی سے سوئچ کر کے اپنا مطالعہ وہیں سے جاری رکھ سکتا ہے جہاں سے چھوڑا تھا۔ مزید برآں، مختلف ڈیوائسز کے درمیان ریڈنگ پروگریس خود بخود سنک (Sync) ہو جائے گی۔

اس نئے فیچر کی آمد اسپاٹی فائى کے عالمی توسیعی منصوبے کا حصہ ہے۔ سٹریمنگ پلیٹ فارم کا ہدف دنیا بھر کی 180 مارکیٹوں تک اس سہولت کو پھیلانا ہے تاکہ 78 کروڑ سے زائد افراد کو اپنے پلیٹ فارم پر آڈیو بکس سننے یا خریدنے کی سہولت میسر آ سکے۔