پاکستان کرکٹ بورڈ (پی سی بی) نے سری لنکا کے خلاف 2 ٹیسٹ میچوں کی سیریز کے لیے قومی اسکواڈ میں اہم تبدیلیاں کرتے ہوئے آل راؤنڈر عامر جمال اور 3 نئے کھلاڑیوں کو شامل کر لیا، جس کے بعد ٹیم کا مجموعی حجم 16 کھلاڑیوں تک پہنچ گیا ہے۔
19 سالہ بلے باز محمد طیب عارف اور فاسٹ بولرز علی شبیر اور ثاقب خان کو ڈومیسٹک کرکٹ میں شاندار کارکردگی اور سری لنکا کے خلاف پریکٹس میچ میں عمدہ کھیل کا مظاہرہ کرنے پر پہلی مرتبہ قومی ٹیسٹ اسکواڈ کا حصہ بنایا گیا ہے، جبکہ علی عثمان اور عبداللہ فضل کو ابتدائی 14 رکنی اسکواڈ سے ریلیز کر دیا گیا ہے۔
عامر جمال کی شاندار ڈومیسٹک کارکردگی پر واپسی
آل راؤنڈر عامر جمال کی قومی اسکواڈ میں واپسی ڈومیسٹک کرکٹ میں ان کی غیر معمولی کارکردگی کے بعد ممکن ہوئی ہے۔ وہ پاکستان کی جانب سے اب تک 9 ٹیسٹ، 3 ون ڈے اور 6 ٹی20 انٹرنیشنل میچز کھیل چکے ہیں۔
یہ بھی پڑھیں:پاکستان کرکٹ بورڈ کا تاریخی قدم، انڈر 19 کھلاڑیوں کے لیے پہلی بار سینٹرل کنٹریکٹس کا اعلان
عامر جمال نے پریذیڈنٹس ٹرافی گریڈ ون کے فائنل میں بہترین آل راؤنڈ کارکردگی کا مظاہرہ کرتے ہوئے 32 رنز کے عوض 7 وکٹیں حاصل کیں اور 55 رنز کی اہم اننگز بھی کھیلی، جس کی بدولت مارخور آئی ٹی سلوشنز نے ٹائٹل اپنے نام کیا۔ انہیں فائنل کا بہترین کھلاڑی قرار دیا گیا۔
Update on Pakistan Test squad
Details here ➡️ https://t.co/TCcv9DXkX7
#PAKvSL | #PakistanCricket https://t.co/VWlMnldpAF
— PCB Media (@TheRealPCBMedia) November 7, 2026
انہوں نے قائداعظم ٹرافی گولڈ کے ابتدائی راؤنڈ میں بھی اپنی صلاحیتوں کا لوہا منوایا، جہاں لاہور وائٹس کی قیادت کرتے ہوئے3 وکٹیں حاصل کرنے کے علاوہ پہلی اننگز میں74 اور دوسری اننگز میں 23 رنز بنائے۔
واضح رہے کہ عامر جمال کو پاکستان کے حالیہ دورہ انگلینڈ کے دوران وطن واپس بھیجے جانے والے کھلاڑیوں میں شامل کیا گیا تھا، تاہم ڈومیسٹک کرکٹ میں مسلسل عمدہ کارکردگی نے انہیں دوبارہ قومی ٹیم میں جگہ دلا دی۔
19 سالہ طیب عارف کی پہلی بار قومی ٹیم میں انٹری
نوجوان بلے باز محمد طیب عارف نے اپنی غیر معمولی بیٹنگ کارکردگی کی بدولت قومی ٹیسٹ اسکواڈ میں جگہ بنائی ہے۔
سیالکوٹ سے تعلق رکھنے والے 19 سالہ دائیں ہاتھ کے بلے باز نے اپنے پہلے ہی فرسٹ کلاس سیزن میں کنگز مین اکیڈمی کی نمائندگی کرتے ہوئے 7 میچز میں 66.09 کی شاندار اوسط سے 727 رنز اسکور کیے، جن میں 3 سینچریاں بھی شامل ہیں۔
ان کی یہ کارکردگی انہیں رواں ڈومیسٹک سیزن کے نمایاں بلے بازوں میں شامل کرنے کے لیے کافی ثابت ہوئی۔
علی شبیر اور ثاقب خان بھی پہلی بار قومی اسکواڈ کا حصہ
19 سالہ فاسٹ بولر علی شبیر نے 8 فرسٹ کلاس میچز میں 22 وکٹیں حاصل کرکے سلیکٹرز کی توجہ حاصل کی۔ انہوں نے اسلام آباد کلب میں سری لنکا کے خلاف پی سی بی پیٹرنز الیون کی جانب سے 3 روزہ پریکٹس میچ میں بھی 3 وکٹیں حاصل کیں۔
میڈیا رپورٹس کے مطابق قومی ٹیم کے بولنگ کوچ شان ٹیٹ نوجوان فاسٹ بولر کی رفتار اور بولنگ ردھم سے خاصے متاثر ہوئے، جس کے بعد انہیں قومی اسکواڈ میں شامل کرنے کا فیصلہ کیا گیا۔
دوسری جانب ثاقب خان نے قائداعظم ٹرافی 2025-26 میں کراچی بلیوز کی ٹائٹل جیتنے والی مہم کے دوران نمایاں کارکردگی کا مظاہرہ کیا۔ انہوں نے 9 میچز میں 20.60 کی اوسط سے 47 وکٹیں حاصل کیں، جبکہ ان کی بہترین انفرادی بولنگ 34 رنز کے عوض 7 وکٹیں رہی۔
ان کی مسلسل عمدہ کارکردگی نے انہیں پہلی مرتبہ قومی ٹیسٹ ٹیم میں جگہ دلانے میں اہم کردار ادا کیا۔
سری لنکا کے خلاف ٹیسٹ سیریز کا شیڈول
پاکستان اور سری لنکا کے درمیان 2 ٹیسٹ میچوں کی سیریز کا پہلا مقابلہ پیر سے راولپنڈی کرکٹ اسٹیڈیم میں شروع ہوگا، جبکہ دوسرا ٹیسٹ 17 سے 21 نومبر تک لاہور کے قذافی اسٹیڈیم میں کھیلا جائے گا۔
مزید پڑھیں:پاکستان کرکٹ بورڈ کے ’اسکول ٹیلنٹ ہنٹ‘ سیزن 2 کا کل سے آغاز، چیئرمین پی سی بی افتتاح کریں گے
دونوں مقابلے آئی سی سی ورلڈ ٹیسٹ چیمپیئن شپ 2025-27 کا حصہ ہیں، جس میں پاکستان اس وقت پوائنٹس ٹیبل پر آخری پوزیشن پر موجود ہے، جبکہ سری لنکا ساتویں نمبر پر ہے۔
پاکستانی ٹیم کے لیے یہ سیریز ورلڈ ٹیسٹ چیمپیئن شپ میں اپنی پوزیشن بہتر بنانے اور ہوم گراؤنڈ پر مضبوط آغاز کرنے کے حوالے سے خاص اہمیت رکھتی ہے۔
نوجوان کھلاڑیوں کو مواقع دینے کی پالیسی
قومی اسکواڈ میں حالیہ اضافے سے واضح ہوتا ہے کہ ٹیم مینجمنٹ اور کرکٹ بورڈ ڈومیسٹک کرکٹ میں نمایاں کارکردگی دکھانے والے نوجوان کھلاڑیوں کو قومی سطح پر مواقع دینے کے خواہاں ہیں۔
ابتدائی اسکواڈ میں بھی کئی نسبتاً کم تجربہ کار کھلاڑی شامل تھے، جن میں محمد طٰہٰ، سمیر منہاس، محمد سلیمان اور آل راؤنڈر رضا اللہ نمایاں ہیں۔
رضا اللہ نے رواں سال کے آغاز میں ایجبسٹن میں انگلینڈ کے خلاف اپنے ٹیسٹ ڈیبیو پر غیر معمولی کارکردگی کا مظاہرہ کیا تھا۔ انہوں نے پہلے 4 وکٹیں حاصل کیں اور بعد ازاں صرف جارحانہ بیٹنگ کا مظاہرہ کرتے ہوئے 81 رنز بنا ڈالے، جن میں 9 چھکے شامل تھے۔
نوجوان کھلاڑیوں کو مسلسل مواقع دینے کی پالیسی کو مستقبل کے لیے مضبوط ٹیسٹ ٹیم کی تشکیل کی کوشش قرار دیا جا رہا ہے۔
محمد عباس پیس اٹیک کی قیادت کریں گے، ہوم گراؤنڈ پر 5 وکٹوں کی خواہش
سری لنکا کے خلاف اہم سیریز میں پاکستان کے تجربہ کار فاسٹ بولر محمد عباس پیس اٹیک کی قیادت کریں گے، جنہوں نے اب تک ٹیسٹ کرکٹ میں 110 سے زیادہ وکٹیں حاصل کر رکھی ہیں اور ان کی بولنگ اوسط 20 کے ابتدائی ہندسے میں ہے۔
محمد عباس نے اسلام آباد کلب میں قومی ٹیم کے پریکٹس سیشن کے موقع پر میڈیا سے گفتگو کرتے ہوئے کہا کہ وہ بہترین فارم میں ہیں اور اپنی کارکردگی کا تسلسل برقرار رکھنے کی کوشش کریں گے۔
ان کا کہنا تھا کہ پاکستان میں کھیلتے ہوئے اب تک 5 وکٹیں حاصل کرنے کی خصوصی خواہش پوری نہیں ہو سکی، تاہم وہ اس سیریز میں یہ اعزاز اپنے نام کرنے کی کوشش کریں گے۔
محمد عباس نے کہا کہ ’اللہ کا شکر ہے کہ میں فارم میں ہوں اور اسے برقرار رکھنے کی کوشش کروں گا۔ پاکستان میں مجھے ایک بڑی کارکردگی، یعنی 5 وکٹیں حاصل کرنے کا اعزاز اپنے نام کرنا ہے، اس لیے کوشش ہوگی کہ یہاں بھی اپنا نام ریکارڈ بک میں درج کرا سکوں۔‘
انگلینڈ اور آسٹریلیا میں شاندار کارکردگی
36 سالہ محمد عباس کا ٹیسٹ کیریئر بیرون ملک شاندار بولنگ کارکردگی سے عبارت ہے۔ انہوں نے 2018 میں متحدہ عرب امارات میں آسٹریلیا کے خلاف ٹیسٹ میچ میں 54 رنز کے عوض 6 وکٹیں حاصل کرنے کے ساتھ میچ میں مجموعی طور پر 95 رنز دے کر 10 کھلاڑیوں کو آؤٹ کیا تھا۔
یہ بھی پڑھیں:پی آئی اے اور پاکستان کرکٹ بورڈ کا ایم او یو: عارف حبیب اور محسن نقوی کی دلچسپ گفتگو
اس کے علاوہ انہوں نے رواں سال لارڈز میں بھی 57 رنز کے عوض 5 وکٹیں حاصل کرکے اپنی صلاحیتوں کا مظاہرہ کیا۔
محمد عباس کے مطابق ان کی مستقل مزاجی کا بنیادی راز ڈومیسٹک ریڈ بال کرکٹ اور انگلش کاؤنٹی کرکٹ میں باقاعدہ شرکت ہے۔ ان کا کہنا تھا کہ وہ تقریباً ہر سال 20 سے 25 روز تک مسابقتی کرکٹ کھیلنے کا موقع حاصل کر لیتے ہیں، جس سے ان کی فارم اور ردھم برقرار رہتا ہے۔
نوجوان کھلاڑیوں کی شمولیت خوش آئند ہے، محمد عباس
تجربہ کار فاسٹ بولر نے قومی اسکواڈ میں نوجوان کھلاڑیوں کی شمولیت کا خیرمقدم کرتے ہوئے کہا کہ یہ ان کے لیے اپنی صلاحیتیں منوانے اور مستقبل میں قومی ٹیم میں مستقل جگہ بنانے کا بہترین موقع ہے۔
انہوں نے کہا کہ ’اس ٹیم میں کئی نوجوان کھلاڑی شامل ہیں۔ کرکٹ بورڈ اور ٹیم مینجمنٹ نے فیصلہ کیا ہے کہ نوجوانوں کو مواقع دیے جانے چاہییں۔ یہ ان کے لیے اپنی صلاحیتیں دکھانے اور مستقبل کے لیے ٹیم میں اپنی جگہ یقینی بنانے کا بڑا موقع ہے۔ یہ ایک اچھی علامت ہے۔‘
محمد عباس نے خصوصاً رضا اللہ کی تعریف کرتے ہوئے انہیں مستقبل کا ایک اچھا کھلاڑی قرار دیا۔ ان کے مطابق رضا اللہ سیکھنے اور اپنی کارکردگی میں بہتری لانے کے لیے ہمیشہ تیار رہتے ہیں، جو ایک نوجوان کرکٹر کے لیے انتہائی اہم خوبی ہے۔
انہوں نے کہا کہ سیریز کے لیے قومی ٹیم کی تیاریاں اچھی رہی ہیں اور کھلاڑیوں کو پہلے ٹیسٹ سے قبل میچ پریکٹس کا بھی موقع ملا ہے۔
تاہم انہوں نے خبردار کیا کہ سری لنکا کو آسان حریف تصور نہیں کرنا چاہیے۔ ان کے مطابق کھلاڑیوں کے لیے ضروری ہے کہ وہ پہلے کنڈیشنز کا جائزہ لیں اور پوری سیریز کے دوران مستقل مزاجی سے بہترین کارکردگی کا مظاہرہ کریں۔
پاکستان کو سری لنکا کے خلاف برتری حاصل
پاکستان اور سری لنکا کے درمیان اب تک 59 ٹیسٹ میچز کھیلے جا چکے ہیں، جن میں پاکستان نے 23 مقابلوں میں کامیابی حاصل کی، جبکہ سری لنکا نے 17 میچز جیتے۔ دونوں ٹیموں کے درمیان 19 ٹیسٹ ڈرا ہوئے۔
دونوں ملکوں کے درمیان پاکستان میں کھیلی گئی آخری ٹیسٹ سیریز 2019-20 میں ہوئی تھی، جس میں میزبان ٹیم نے 1-0 سے کامیابی حاصل کی تھی۔
مزید پڑھیں:پاکستان کرکٹ بورڈ میں اربوں روپوں کے گھپلوں کا انکشاف، محسن نقوی بھی زد میں آسکتے ہیں؟
سری لنکا کی قیادت اس مرتبہ کوشل مینڈس کریں گے۔ 15 رکنی سری لنکن اسکواڈ میں تجربہ کار بلے باز دنیش چندیمل، دھننجایا ڈی سلوا اور اسپنر پربتھ جے سوریا بھی شامل ہیں، جبکہ پاتھم نسانکا کی بھی ٹیم میں شمولیت کے امکانات موجود ہیں۔
پاکستان کا نظرثانی شدہ 16 رکنی ٹیسٹ اسکواڈ
پی سی بی کی جانب سے سری لنکا کے خلاف ٹیسٹ سیریز کے لیے اعلان کردہ نظرثانی شدہ اسکواڈ میں کپتان بابر اعظم سمیت درج ذیل کھلاڑیوں کی شمولیت متوقع ہے۔
بابر اعظم (کپتان)، عامر جمال، علی شبیر، عرفات منہاس، اذان اویس، محمد عباس، محمد غازی غوری (وکٹ کیپر)، محمد سلیمان، محمد طٰہٰ، محمد طیب عارف، رضا اللہ، سعد بیگ (وکٹ کیپر)، سلمان علی آغا، سمیر منہاس، ثاقب خان، سعود شکیل شامل ہیں۔
