جماعت اسلامی کے نائب امیر لیاقت بلوچ نے کہا ہے کہ نائب وزیراعظم و وزیر خارجہ اسحاق ڈار نے ان سے ٹیلی فون پر رابطہ کیا ہے، جس میں حکومت اور جماعت اسلامی کے درمیان جاری مذاکرات کے حوالے سے تفصیلی تبادلہ خیال کیا گیا۔
لیاقت بلوچ کے مطابق حکومت اور جماعت اسلامی کی مذاکراتی سب کمیٹی کے درمیان بات چیت کا حتمی دور 10 نومبر کو ہوگا، جس کی میزبانی نائب وزیراعظم اسحاق ڈار کریں گے۔
انہوں نے بتایا کہ مذاکراتی اجلاس وزارت خارجہ کی عمارت میں منعقد ہوگا۔
نائب امیر جماعت اسلامی کا کہنا تھا کہ حکومت اور جماعت اسلامی کی مذاکراتی سب کمیٹی کا اجلاس پہلے ہی ہو چکا ہے جبکہ ٹیکنیکل کمیٹی بھی اپنی میٹنگ مکمل کر چکی ہے۔
لیاقت بلوچ نے زور دیا کہ اب حکومت کو پیٹرولیم لیوی اور عوام کو ریلیف فراہم کرنے کے لیے عملی اقدامات کرنے چاہییں۔
واضح رہے کہ جماعت اسلامی کی جانب سے پیٹرولیم لیوی ختم کرنے کا مطالبہ کیا جارہا ہے، تاہم دوسری جانب حکومت کا کہنا ہے کہ آئی ایم ایف پروگرام میں ہونے کی وجہ سے لیوی کا خاتمہ ممکن نہیں، تاہم مستحق افراد کو ریلیف کا سلسلہ جاری رکھا جائےگا۔
