بلوچستان میں امریکی سفارت خانے کے امریکن ایمبیسیڈرز فنڈ فار کلچرل پریزرویشن (اے ایف سی پی) کے تحت پہلے منصوبے کی کامیاب تکمیل پر خصوصی تقریب منعقد ہوئی، جس میں امریکی ناظم الامور نیٹلی بیکر، بلوچستان کے پارلیمانی سیکرٹری نواب زادہ میر محمد زرین خان مگسی اور سندھ ایکسپلوریشن اینڈ ایڈونچر سوسائٹی (سیز) کی قیادت نے شرکت کی۔
کراچی میں منعقدہ تقریب کا اہتمام بلوچستان کے مہر گڑھ عجائب گھر کے لیے اے ایف سی پی منصوبے کی کامیاب تکمیل کے سلسلے میں کیا گیا، جس کے دوران عجائب گھر کی یادگاری تختی کی نقاب کشائی بھی کی گئی۔
یہ بلوچستان میں امریکن ایمبیسیڈرز فنڈ فار کلچرل پریزرویشن کے تحت مکمل ہونے والا پہلا منصوبہ ہے، جسے سندھ ایکسپلوریشن اینڈ ایڈونچر سوسائٹی اور محکمہ ثقافت بلوچستان کے اشتراک سے پایہ تکمیل تک پہنچایا گیا۔
مہر گڑھ کے تاریخی آثار کو محفوظ بنانے کے لیے اہم اقدامات
منصوبے کے تحت قدیم نیولیتھک یعنی نئے حجری دور اور تاریخی مہر گڑھ تہذیب سے تعلق رکھنے والے آثار قدیمہ کو محفوظ بنایا گیا ہے۔
اس کے علاوہ عجائب گھر میں تاریخی نوادرات کی نمائش اور دیکھ بھال کے انتظامات کو بین الاقوامی معیار کے مطابق جدید خطوط پر استوار کیا گیا، جبکہ عوامی آگاہی کی سرگرمیوں کا دائرہ بھی وسیع کیا گیا۔
تاریخی آثار کی طویل مدتی حفاظت اور دیکھ بھال یقینی بنانے کے لیے مقامی ثقافتی ماہرین کو خصوصی تربیت بھی فراہم کی گئی۔
اس منصوبے کی تکمیل کے بعد اے ایف سی پی کی سرگرمیوں کا دائرہ پاکستان کے چاروں صوبوں تک پھیل گیا ہے، جو پاکستان کے ثقافتی ورثے کے تحفظ کے لیے امریکا کے دیرپا عزم کی عکاسی کرتا ہے۔
مہر گڑھ کی 8000 سال قدیم تہذیب کو اجاگر کیا جائے گا، نیٹلی بیکر
تقریب سے خطاب کرتے ہوئے امریکی ناظم الامور نیٹلی بیکر نے کہا کہ پائیدار نتائج حاصل کرنے اور پاکستان اور امریکا کے عوام کے درمیان باہمی اعتماد کو مزید مضبوط بنانے میں امریکی مہارت اہم کردار ادا کر رہی ہے۔
انہوں نے کہا کہ یہ خوشی کا موقع ہے کہ عجائب گھروں اور ثقافتی ورثے کے تحفظ میں اعلیٰ امریکی مہارت کی بدولت بلوچستان کا مہر گڑھ عجائب گھر 8000 سال قدیم مہر گڑھ تہذیب اور دیگر تاریخی ادوار کو شاندار انداز میں پیش کرے گا۔
نیٹلی بیکر کا کہنا تھا کہ اس نوعیت کے منصوبے ثابت کرتے ہیں کہ امریکی مہارت کے ذریعے دیرپا اور نمایاں نتائج حاصل کیے جا سکتے ہیں۔
انہوں نے کہا کہ ایسے اقدامات نہ صرف تاریخی ورثے کو محفوظ بناتے ہیں بلکہ روزگار کے نئے مواقع پیدا کرکے مقامی آبادیوں کو معاشی اور سماجی طور پر بااختیار بنانے میں بھی مدد دیتے ہیں۔
امریکی ناظم الامور کے مطابق پاکستان اور امریکا مشترکہ کوششوں کے ذریعے اس عظیم ثقافتی ورثے کے تحفظ میں حقیقی پیش رفت کر رہے ہیں۔
مہر گڑھ عجائب گھر رواں ماہ دوبارہ کھولا جائے گا
تقریب کے دوران امریکی ناظم الامور نیٹلی بیکر، بلوچستان کے پارلیمانی سیکریٹری نواب زادہ زرین مگسی اور منصوبے کی قیادت کرنے والے ڈاکٹر اسما ابراہیم اور ڈاکٹر کلیم اللہ لاشاری نے مشترکہ طور پر یادگاری تختی کی نقاب کشائی کی۔
یہ یادگاری تختی رواں ماہ کوئٹہ میں مہر گڑھ عجائب گھر کی باضابطہ دوبارہ کشادگی سے قبل اس کے مرکزی دروازے پر نصب کی جائے گی۔
