نگران وزیراعلیٰ پنجاب محسن نقوی نے عیدالاضحی کے تینوں روز لاہور سمیت پنجاب بھر میں صفائی کے بہترین انتظامات پر پوری ٹیم کو مبارکباد دیتے ہوئے کہا کہ صوبائی وزراء، کمشنرز، ڈپٹی کمشنرز، سالڈ ویسٹ کمپنیوں، لوکل گورنمنٹ، سپیشل برانچ کے افسران اور سٹاف کی کارکردگی قابل تحسین رہی ہے۔
وزیراعلیٰ آفس سے جاری اعلامیے کے مطابق محسن نقوی نے مزید کہا کہ صوبائی وزراء نے عید صفائی آپریشن کو محنت سے مؤثر انداز میں مانیٹر کیا اور صفائی کے انتظامات کو یقینی بنایا۔ صفائی کے بہترین انتظامات پر صوبائی وزراء اور پوری ٹیم کی کارکردگی کو سراہتا ہوں۔
انہوں نے کہا کہ صفائی کے شاندار انتظامات کرکے سالڈ ویسٹ کمپنیاں، انتظامیہ اور متعلقہ ادارے شہریوں کی توقعات پر پورا اترے ہیں۔ صفائی انتظامات کے حوالے سے تعاون پر شہریوں کا بھی شکریہ ادا کرتے ہیں۔
نگران وزیراعلیٰ کا کہنا تھا کہ لاہور سمیت پنجاب بھر میں صفائی کے بہترین انتظامات کو یقینی بنانے پر متعلقہ ادارو ں کی کارکردگی قابل تعریف رہی ہے، اسی جذبے، محنت اور لگن سے کام کرتے ہوئے اپنے شہروں کو خوبصورت اور صاف ستھرا بنانے کا کام تسلسل کے ساتھ جاری رکھنا ہے۔
