پنجاب حکومت نے زرعی اراضی پاک فوج کو دینے سے متعلق سنگل بینچ کے فیصلے کے خلاف اپیل دائر کر دی۔ لاہور ہائیکورٹ کے 2 رکنی بینچ نے سنگل بینچ کا فیصلہ فوری معطل کرنے کی حکومتی استدعا مسترد کردی۔
لاہور ہائیکورٹ نے پنجاب حکومت کی اپیل پر فریقین کو 17 جولائی کے لیے نوٹسز جاری کر دیے۔
پنجاب حکومت نے اپنی درخواست میں موقف اختیار کیا ہے کہ عدالت کو پالیسی معاملات میں دخل اندازی کا اختیار نہیں ہے۔ عدالتی فیصلے میں تضاد ہے کیوں کہ درخواست گزار متاثرہ فریق نہیں۔
حکومت نے موقف اختیار کیا ہے کہ ایگریکلچرل پالیسیوں کو ریگولیٹ کرنا عدالتوں کی ذمہ داری نہیں ہے۔ عدالتیں ایگزیکٹو کے اختیارات میں دخل اندازی نہیں کر سکتیں۔
حکومت نے کہا ہے کہ سنگل بینچ نے فوج کو زمین دینے کے نوٹیفکیشن کو قانون کے برعکس کالعدم قرار دیا۔ موجودہ نگران کابینہ نے پہلی کابینہ کے فیصلے کو پایہ تکمیل تک پہنچایا۔ قانون کے مطابق نگران حکومت سابقہ حکومت کے کسی نامکمل اقدام یا پالیسی کی تکمیل کرسکتی ہے۔
اپیل میں کہا گیا ہے کہ منصوبہ نگران حکومت نے شروع نہیں کیا اس سے پہلے منتخب حکومت نے شروع کیا تھا۔ لاہور ہائیکورٹ زمین فوج کو دینے کے نوٹیفکیشن کو کالعدم قرار دینے کا سنگل بنچ کا فیصلہ کالعدم قرار دے اور حتمی فیصلے تک سنگل بینچ کے احکامات پر عملدرآمد رکوائے۔
