جمعیت علمائے اسلام کے سربراہ مولانا فضل الرحمان کی زیر صدارت پارٹی کی مرکزی مجلس عاملہ کا اجلاس ہوا ہے جس میں یہ فیصلہ کیا گیا ہے کہ جے یو آئی (ف) آئندہ عام انتخابات میں بھرپور حصہ لے گی۔
ترجمان جے یو آئی مولانا عبدالغفور حیدری کے مطابق جمعیت علمائے اسلام کی مرکزی مجلس عاملہ کے اجلاس میں عام انتخابات کی تیاریوں کا جائزہ لیا گیا۔ اجلاس میں مختلف تجاویز بھی زیر بحث آئی ہیں۔ یہ اجلاس پیر تک جاری رہے گا۔
اسلام آباد : جے یو آئی کی مرکزی مجلس عاملہ کا اجلاس pic.twitter.com/XSN5liywNf
— Jamiat Ulama-e-Islam Pakistan (@juipakofficial) July 16, 2023
اجلاس نے پاکستان اور افغانستان کے درمیان اختلافی بیانات پر گہری تشویش کا اظہار کیا ہے اور دونوں ممالک کو مشورہ دیا گیا ہے کہ افہام و تفہیم کا راستہ اختیار کیا جائے، حالات کی بہتری کے لیے سیاسی اور عسکری سطح پر رابطے ہونے چاہییں۔
مولانا عبدالغفور حیدری نے کہا کہ دونوں ممالک کے درمیان باہمی اعتماد کی بحالی کے روابط جاری رکھنا ناگزیر ہے، امن و استحکام افغانستان اور پاکستان کی ضرورت ہے، اس حوالے سے دونوں ملکوں کو کردار کے لیے آگے بڑھنا ہوگا۔
ترجمان جے یو آئی نے بتایا کہ اجلاس میں دستوری کمیٹی کی سفارشات بھی پیش کی گئی ہیں، ان سفارشات پر مشاورت کا عمل پیر تک جاری رہے گا۔