معروف پاکستانی اداکار فیصل قریشی نے کہا ہے کہ بھارتی حلقے پاکستانی مواد کو نیٹ فلکس پر جگہ ملنے کے حق میں نہیں۔
حالیہ پوڈکاسٹ کے دوران جب میزبان نے ان سے سوال کیا کہ آپ کے خیال میں پاکستانی مواد نیٹ فلکس پر کب نظر آئے گا؟ تو فیصل قریشی نے جواب دیتے ہوئے کہا ’اگر سچ بولوں تو بھارتی نہیں چاہتے کہ پاکستانی مواد نیٹ فلکس پر آئے‘۔ دوسری بات یہ ہے کہ ہم سچ نہیں بولتے جبکہ نیٹ فلکس کے لیے حقیقت دکھانا ضروری ہوتا ہے۔
ان کا مزید کہنا تھا کہ نیٹ فلکس چاہتا ہے کہ ہر ملک اپنی خامیاں اور تاریک پہلو بھی دنیا کے سامنے لائے۔ آپ کو اپنے ملک میں ہونے والی حقیقت دکھانی پڑتی ہے لیکن پاکستان میں سب کچھ دکھانا ممکن نہیں کیونکہ جو فلم ساز ملک کی اصل تصویر پیش کرے گا شاید وہ بعد میں پاکستان میں رہ بھی نہ سکے۔
فیصل قریشی کا کہنا تھا کہ ایک اور مسئلہ یہ ہے کہ بھارت بھی نہیں چاہتا کہ پاکستانی مواد نیٹ فلکس پر جگہ بنائے۔ اس کے علاوہ پاکستان میں زیادہ تر لوگ نیٹ فلکس اپنی ذاتی سبسکرپشن کے ذریعے نہیں دیکھتے۔ کوئی دوست یا بیرونِ ملک رہنے والے رشتہ دار کا اکاؤنٹ استعمال کرتا ہے جبکہ کئی لوگ ایک ہی سبسکرپشن آپس میں شیئر کرتے ہیں۔
یہ بھی پڑھیں: اب تک ستارہ امتیاز نہ ملنے پر اداکار فیصل قریشی کا شکوہ
انہوں نے کہا کہ اس وجہ سے نیٹ فلکس کو پاکستان سے وہ آمدنی نہیں ملتی جو بھارت سے حاصل ہوتی ہے اسی لیے نیٹ فلکس پر بھارتی مارکیٹ کا اثر و رسوخ زیادہ ہے۔ پاکستان میں تو ہماری آنے والی فلم کے بارے میں سب سے پہلا سوال یہی ہوتا ہے کہ یہ یوٹیوب پر کب آئے گی؟
