پاکستان میں تعینات سعودی سفیر نواف سعید اے المالکی اور گورنر سندھ کامران خان ٹیسوری کے درمیان گورنر ہاؤس کراچی میں ہونیوالی اس ملاقات میں پاک سعودی تعلقات، باہمی تجارت کے فروغ، صوبہ میں سرمایہ کاری کے مواقع سمیت باہمی دلچسپی کے دیگر امور پر تبادلہ خیال کیا گیا۔
سعودی سفیر کا کہنا تھا کہ سعودی حکومت پاکستان سے تعلقات کو خصوصی اہمیت دیتی ہے۔ گورنر سندھ کے مطابق پاک سعودی تعلقات کئی دہائیوں پر محیط ہیں۔اسلامی اخوت پاک سعودی عرب تعلقات کی بنیاد ہے جبکہ مقامات مقدسہ کے باعث سعودی عرب کو پاکستانی عوام سے خاص عقیدت ہے۔
گورنر سندھ کامران ٹیسوری کا کہنا تھا کہ سعودی عرب نے ہر مشکل وقت میں پاکستان کی بھرپور مدد کی ہے۔ یہی وجہ ہے کہ پاکستان سعودی عرب سے تعلقات کو خاص اہمیت دیتا ہے۔ انہوں نے صوبہ میں سرمایہ کاری کے سازگار ماحول سے سعودی سرمایہ کاروں کو بھرپور فائدہ اٹھانے کا مشورہ دیا۔
