امریکا نے پاکستان پر زور دیا ہے کہ اسمبلی تحلیل اور آئندہ انتخابات کے حوالے سے پاکستان آئین و قانون کے مطابق فیصلے کرے۔
بدھ کے روز امریکا کے محکمہ خارجہ کے ترجمان میتھیو ملر نے ایک صحافی کے سوال کے جواب میں کہا کہ پاکستان کے عوام ہی آئین و قانون کے مطابق پاکستان کی سیاست کا فیصلہ کریں گے، آئندہ انتخابات اور اسمبلی تحلیل کے حوالے سے پاکستانی حکام پر زور دیتے ہیں کہ وہ آئین و قانون پر عمل کریں۔
ترجمان میتھیو ملر کا کہنا ہے کہ جس طرح امریکا دوسرے ممالک کے ساتھ تعلقات بہتر بنانا چاہتا ہے، اسی طرح امریکا پاکستان کے ساتھ بھی بہت سے معاملات میں بہتری چاہتا ہے۔
اس سے قبل گزشتہ دنوں بھی امریکی محکمہ خارجہ کے ترجمان نے اپنے بیان میں کہا تھا کہ امریکا پاکستان میں انتخابات میں کسی ایک امیدوار کی حمایت نہیں کرے گا بلکہ ہم پاکستان میں صاف و شفاف انتخابات چاہتے ہیں۔
