قومی کرکٹ ٹیم کے سابق کپتان سرفراز احمد نے کہا ہے کہ دنیا کی نمبر ون ٹیم بننے سے ٹیم کا حوصلہ بڑھا ہے، ایشیا کپ جیتنے کے لیے کھلاڑیوں کوتمام ٹیموں کے خلاف کھیل کے تینوں شعبوں میں 100 فیصد کارکردگی کا مظاہرہ کرنا پڑے گا۔
جنوبی افریقا کے کراچی میں اعزازی قونصل جنرل مجید بشیراحمد کی جانب سے پاک جنوبی افریقہ ویمنز ٹیموں کے اعزاز میں ظہرانے میں شرکت کے موقع پر صحافیوں سے گفتگو کرتے ہوئے سرفراز احمد نے کہاکہ ایشیا کپ میں کھیلے جانے والے پاک بھارت ہائی وولٹیج میچ پر دنیا بھر کی نظریں مرکوز ہیں۔
انہوں نے کہاکہ ایشیا کپ میں قومی ٹیم جس انداز سے بھارت کے خلاف کھیلے ویسے ہی جذبے سے تمام ٹیموں کے خلاف کھیلنا ہوگا۔ اس وقت پاکستانی ٹیم بھارت سے بہت بہتر ہے، فتح کے لیے کھلاڑیوں کو تینوں شعبوں میں عمدہ پرفارم کرنا ہو گا۔
انہوں نے کہا کہ افغانستان کے خلاف اچھی کرکٹ کھیل چکے ہیں، کھلاڑی جتنے رنز کریں گے اتنے ہی اچھا پرفارم کریں گے، ورلڈ نمبر ون ٹیم بننے کے بعد کھلاڑیوں کے حوصلے بلند ہوئے ہیں، امید ہے کہ ٹیم ورلڈکپ میں بھی بہتر پرفارم کرے گی۔
