عام انتخابات کی تاریخ کا اعلان کریں، پی ٹی آئی کا صدر مملکت کو خط

پاکستان تحریک انصاف (پی ٹی آئی) نے صدر مملکت ڈاکٹر عارف علوی سے انتخابات کی تاریخ کے فوری اعلان کا مطالبہ کر دیا ہے۔

پی ٹی آئی کے مرکزی سیکریٹری جنرل عمر ایوب نے عارف علوی کو خط لکھا ہے جس میں کہا گیا ہے کہ دستور کا آرٹیکل 48 (5) صدر کی جانب سے قومی اسمبلی کی تحلیل کی صورت میں صدر مملکت کو انتخابات کے انعقاد کے لیے 90 روز کی مدت کے اندر کی کسی تاریخ کے تعین کا پابند بناتا ہے۔

’سپریم کورٹ آف پاکستان پنجاب اور خیبرپختونخوا میں انتخابات کے حوالے سے از خود نوٹس کے فیصلوں میں آئین کے اس آرٹیکل کی پوری سراہت سے تشریح کر چکی ہے‘۔

عمر ایوب نے کہا ہے کہ دستور اور سپریم کورٹ کے فیصلے کی روشنی میں انتخابات کی تاریخ کا تعین صدر کا استحقاق اور اہم ترین آئینی فریضہ ہے، دستور کا آرٹیکل 5 ہر شہری کو ریاست سے وفاداری اور آئین و قانون کی مکمل تابعداری کا پابند بناتا ہے۔

عمر ایوب میں خط میں لکھا ہے کہ دستور کی تمہید کے تحت ریاست عوام کے منتخب نمائندوں کے ذریعے ہی اپنے اختیارات و اقتدار کے استعمال کی پابند ہے، چنانچہ قومی اسمبلی کے انتخابات جمہوریت کا بنیادی تقاضا ہیں، جس کے بغیر ریاست کے لیے آئین پر عمل ممکن نہیں۔

عمر ایوب نے صدر کو مخاطب کرتے ہوئے لکھا ’آپ نے وزیر اعظم کے مشورے پر 9 اگست کو قومی اسمبلی تحلیل کی، اسمبلی کی تحلیل کے بعد انتخابات کی تاریخ کا تعین بھی آپ کے ذمے ہے، انتخابات کی تاریخ کے تعین کے حوالے سے الیکشن ایکٹ 2017 کا سیکشن 57 کلی طور پر آئین کے تابع ہے‘۔

انہوں نے کہاکہ آئین و قانون کا مسلمہ قانون یہی ہے کہ آئین کو ملک میں رائج تمام قوانین پر مکمل فوقیت حاصل ہے، چنانچہ دستور کے آرٹیکل 48(5) کی رو سے انتخابات کی تاریخ کا تعین بطور صدر مملکت آپ کے ہی ذمے ہے۔

عمر ایوب نے لکھا ہے کہ بطور صدرِ مملکت آپ انتخابات کی تاریخ کا اعلان کرتے ہوئے آئینی تقاضا پورا کریں تاکہ عوام کو موقع مل سکے کہ وہ اپنے نمائندوں کا انتخاب کر سکیں۔ اور آئین و ریاست عوام کی منشا کے مطابق کام کرنا شروع کریں۔