کوئٹہ کے نواحی علاقہ سریاب روڈ پر دہشت گردوں نے ایک بار پھر سیکیورٹی فورسز کو نشانہ بناتے ہوئے دستی بم سے حملہ کرکے دو راہگیروں کو زخمی کردیا ہے۔
پولیس کے مطابق منگل کی صبح صوبائی دارالحکومت کے نواحی علاقے سریاب روڈ پر نامعلوم افراد نے ڈیوٹی پر مامور پولیس ٹیم پر دستی بم سے حملہ کیا۔ دھماکے کے نتیجے میں پولیس اہلکار محفوظ رہے تاہم دو راہ گیر زخمی ہوگئے۔
دھماکے کے فوراً بعد امدادی ٹیمیں جائے وقوعہ پر پہنچ گئیں جہاں سے زخمیوں کو سول اسپتال منتقل کردیا گیا ہے، جہاں ٹراما سینٹر میں انہیں طبی امداد دی جارہی ہے۔
سول ہسپتال حکام کے مطابق زخمیوں کی شناخت کریم نواز اور نیاز اللہ سے ہوئی جن کی حالت خطرے سے باہر بتائی جارہی ہے۔
پولیس نے علاقے کو گھیرے میں لے کر ملزمان کی تلاش شروع کردی۔ دستی بم حملے کی ذمہ داری کالعدم دہشت گرد تنظیم تحریک طالبان پاکستان نے قبول کی ہے۔
