چیئرمین تحریک انصاف عمران خان نے کہا ہے کہ ملک کو درپیش معاشی بحران سے نکالنے کے لیے الیکشن نا گزیر ہیں، یہ حکمران مزید جتنے دن اقتدار میں رہیں گے ملک کو اتنا ہی زیادہ نقصان ہو گا۔
نمائندہ وی نیوز کے مطابق سابق وزیر اعظم عمران خان سے مسلم لیگ ق کے راہنما چودھری پرویز الہی نے زمان پارک میں ملاقات کی۔ ملاقات میں موجودہ سیاسی صورتحال، جیل بھرو تحریک اور عام انتخابات کے امور پر تبادلہ خیال کیا گیا۔
اس موقع پر گفتگو کرتے ہوئے سابق وزیر اعظم عمران خان نے کہا کہ نااہل ٹولے نے پہلے ملکی معیشت کو تباہ کیا اب آئین کی پامالی کی جا رہی ہے، ملک کو درپیش معاشی بحران سے نکالنے کے لیے الیکشن نا گزیر ہیں۔ یہ حکمران مزید جتنے دن اقتدار میں رہیں گے ملک کو اتنا ہی زیادہ نقصان ہو گا۔
عمران خان نے کہا کہ قوم خوف کے بت توڑ کر میدان میں آ رہی ہے، جیل بھرو تحریک کے تحت ملک بھر سے پارٹی رہنما، کارکن اور عوام رضاکارانہ گرفتاریاں دیں گے، نااہل حکمران ٹولہ الیکشن سے خوفزدہ ہوکر انتقامی کارروائیوں پر اتر آیا ہے۔
پی ٹی آئی کی قیادت اور کارکنوں کے خلاف جھوٹے مقدمات درج کیے جا رہے ہیں، حکمران آئین کو مان رہے ہیں نہ عدالتی فیصلے تسلیم کر رہے ہیں۔
اس موقع پر چودھری پرویز الہی نے کہا کہ آج کے سیاسی فرعونوں کے خلاف قوم نے خوف کے بت توڑ دیئے ہیں، عمران خان پاکستانی عوام کے لیے امید کی روشنی ہیں۔ عمران خان کی عوامی مقبولیت سے خوفزدہ پی ڈی ایم ٹولہ الیکشن سے بھاگ کر آئین شکنی کا مرتکب ہو رہا ہے۔
پرویز الٰہی نے کہا کہ حکمران اتحاد عمران خان سے خوفزدہ ہے ،لاہور ہائیکورٹ کے فیصلے پر بھی عمل نہیں کیا جا رہا، الیکشن کمیشن اور گورنرز یاد رکھیں آئین شکنی پر آئین ہی ان کے خلاف راستہ لے گا۔
اس موقع پر چودھری پرویزالٰہی کی جانب سے عمران خان کی اعلان کردہ جیل بھرو تحریک کی مکمل حمایت کا بھی اعلان کیا گیا۔
