صداقت عباسی کو کم سے کم کسی مقدمے میں تو اندر کرتے، جج اور پولیس کا سماعت کے دوران دلچسپ مکالمہ

اسلام آباد ہائیکورٹ نے پاکستان تحریک انصاف (پی ٹی آئی) کے رہنما صداقت عباسی کی مبینہ گمشدگی پر وزارت داخلہ اور آئی جی سے ایک ہفتے میں رپورٹ طلب کر لی۔

پی ٹی آئی رہنما صداقت عباسی کی بازیابی کیلئے اسلام آباد ہائیکورٹ میں دائر درخواست پرسماعت ہوئی، جسٹس طارق محمود جہانگیری نے کیس کی سماعت کی۔

دوران سماعت جسٹس طارق محمود جہانگیری نے استفسار کیا کہ یہ کیسے ممکن ہے ایک بندہ ریڈ زون پارلیمنٹ لاجز سے اٹھایا گیا، ابھی تک انکوائری مکمل نہیں ہوئی؟

عدالت نے ریمارکس دیے کہ 13 روز سے بندہ غائب ہے اور کسی کو کچھ علم نہیں، بغیر کسی مقدمے کے اٹھا لیا جاتا ہے۔

جسٹس جہانگیری نے پولیس پر برہمی کا اظہار کرتے ہوئے کہا کہ کچھ خیال کریں، کم سے کم کسی مقدمے میں تو ڈالتے، چوری، ڈکیتی اتنے پرچے ہیں، اسلام آباد دارالحکومت ہے، سی سی ٹی وی لگے ہیں ایجنسز ہیں کیا امیج جائے گا؟

عدالت نے کہا کہ ایک کیس سے بندہ رہا ہوتا ہے اسے دوسرے میں اٹھا لیا جاتا ہے یہ کوئی طریقہ نہیں، عدالت نے کیس کی مزید سماعت 26 ستمبر تک ملتوی کردی۔

واضح رہے پی ٹی آئی رہنما عمر ایوب نے یکم ستمبر کو ’ایکس‘ پر اپنی ایک پوسٹ میں دعویٰ کیا تھا کہ مری سے پی ٹی آئی کے سابق ایم این اے صداقت عباسی کو اسلام آباد سے نامعلوم افراد اپنے ساتھ لے گئے ہیں۔

گزشتہ ہفتے کیس کی سماعت کے دوران ایس ایس پی آپریشنز اسلام آباد پولیس نے عدالت کو بتایا تھا کہ صداقت عباسی اسلام آباد پولیس کی تحویل میں نہیں ہیں، صداقت عباسی کی مبینہ گمشدگی کے حوالے سے مقدمہ تھانہ سیکرٹریٹ میں درج کرلیا ہے۔