ملک بھر میں بجلی چوروں اور نادہندگان کے خلاف کارروائیوں کا سلسلہ جاری ہے۔
الیکٹرک سپلائی کمپنیوں کے حکام نے لاہور اور پشاور میں کارروائیاں کی عمل میں لائی ہیں۔
لاہور الیکٹرک سپلائی کمپنی نے کارروائی کرتے ہوئے پیپلز پارٹی لاہور کے سابق صدر عزیز الرحمان چن کی فیکٹری کا بجلی کنکشن کاٹ دیا ہے۔
مزید پڑھیں
’دوسری جانب پشاور الیکٹرک سپلائی کمپنی (پیسکو) کی ٹاسک فورس نے سابق رکن قومی اسمبلی بلال رحمان کے گھر پر چھاپہ مارا ہے۔ بلال رحمان کو 23 لاکھ کا نادہندہ ہونے اور بجلی چوری میں ملوث ہونے پر جرمانے کے ساتھ ایف آئی آر کے لیے بھی تھانے میں درخواست دے دی گئی ہے‘۔
جمعرات 14 ستمبر کو ہونے والی کارروائیوں کی تفصیل بتاتے ہوئے ترجمان پشاور الیکٹرک سپلائی کمپنی (پیسکو) نے بتایا کہ سابق رکن قومی اسمبلی بلال رحمان بھاری مقدار میں بجلی چوری میں ملوث ہیں۔
دوسری جانب لیسکو نے جمعرات کو ہونے والی کارروائیوں کی تفصیلات بتاتے ہوئے کہاکہ نادہندہ ہونے پر اقرا کولڈ اسٹوریج کا کنکشن کاٹ دیا گیا ہے۔ اس کے علاوہ چن گروپ آف انڈسٹریز بھی لیسکو کی نادہندہ ہے۔
ترجمان نے بتایا کہ چن گروپ آف انڈسٹریز کے ذمہ 51 کروڑ 53 لاکھ 15 ہزار 362 روپے واجب الادا ہیں، انہوں نے کہاکہ چن گروپ کے مالک کے 2 کنکشن آئرن انڈسٹری اور رحمان اسٹیل فرنس دونوں پہلے سے ڈیڈ ڈیفالٹر تھے۔ دوران آپریشن پراپرٹی ایک ہونے پر تیسرا کنکشن اقرا کولڈ اسٹوریج بھی کاٹ دیا گیا۔
ترجمان لیکسکو کا کہنا تھا کہ کنکشن چیف انجینیئر او اینڈ ایم (ٹی اینڈ جی) ظفر اقبال کی ہدایت پر کاٹا گیا۔
