بھارتی اداکارہ راکھی ساونت نے ہر مسلمان نوجوانوں سے کہا ہے کہ وہ نماز جمعہ ہی نہیں باقی نمازیں بھی پڑھیں ۔
کچھ عرصہ پہلے ہندو مت چھوڑ کر اسلام قبول کرنے والی راکھی ساونت کی ایک ویڈیو سامنے آئی ہے جس میں وہ بھارتی میڈیا کو انٹرویو دے رہی ہیں۔
انٹرویو میں راکھی ساونت نے اپنے شوہرعادل درانی کے بارے میں گفتگو کرتے ہوئے کہا :’’ میں ( اسے ) کہتی تھی کہ آپ مسلمان ہو ، آپ مجھے اسلام میں لائے ہو، میں عادل کو نماز کیلئے کھینچ کر لاتی تھی اور بولتی تھی نماز پڑھ لو ورنہ شیطان پکڑ لےگا۔‘‘
راکھی نے اپنے انٹرویو میں یہ بھی بتایا کہ عادل جمعے کے علاوہ کوئی نماز نہیں پڑھتا تھا ، میں ہاتھ پاؤں جوڑتی تھی، میں نے اپنا فرض پورا کیا۔ میں ہر مسلمان نوجوان لڑکے لڑکی کو کہوں گی کہ جمعہ کے علاوہ باقی نمازیں بھی پڑھیں۔‘‘
راکھی ساونت نے کہا: ’’ جو دُکھی ہیں وہ تہجد کی نماز بھی پڑھیں، میں یوٹیوب سے دیکھ کر ساری نمازیں پڑھتی ہوں۔‘‘
انہوں نے مزید کہا کہ عادل کی وجہ سے میں نے اسلام قبول کیا، عادل نے مجھے دھوکا دیا لیکن میں اسلام نہیں چھوڑ سکتی۔
یاد رہے کہ عادل خان درانی اور راکھی ساونت نے شادی کی تھی۔ ان کے نکاح کی تصاویر اور ویڈیو بھی سامنے آئی تھیں ۔ تاہم اب راکھی عادل خان سے علیحدگی کا اعلان کرچکی ہیں۔ انھوں نے عادل خان پر کسی دوسری لڑکی سے تعلقات کا الزام عائد کیا تھا۔
