یومِ شہداء پولیس کے موقع پر شہداء کے ورثاء نے اپنے جذبات کا اظہار کرتے ہوئے کہا ہے کہ وطن پر آنے والی ہر مشکل گھڑی میں پاک فوج کے علاوہ پولیس بھی ہراول دستہ میں شامل رہی ہے، پاکستان کی بقاء کی خاطر پولیس کے نوجوانوں اور افسران کی بے لوث اور بے شمار قربانیاں ہمیشہ یاد رکھی جائیں گی۔
اس موقع پر منعقدہ پروگرام میں شہداء پولیس کو خراج عقیدت بھی پیش کیا گیا۔ شہداء کے لواحقین کا کہنا تھا کہ ان کے عزیزوں نے اپنی جان کی قربانی دے کر اس ملک کے دفاع کو مضبوط بنایا ہے۔
شبیر حسین شہید کے بھائی کا کہنا تھا کہ ان کے بڑے بھائی نے ان کا سر فخر سے بلند کر دیا ہے۔ اگر انہیں بھی موقع ملے تو ملک کی خدمت کا یہ موقع ہاتھ سے جانے نہیں دیں گے۔
محمد عاقب شہید کے والد کا کہنا تھا کہ ان کا بیٹا شہید ہوا ہے، اگر ملک کو دوسرے بیٹے کی قربانی کی ضرورت پڑے تو وہ اس کے لیے بھی تیار ہیں۔ ’شہداء ہماری قوم کا فخر ہیں، وہ ہمارے ملک کی حفاظت کرتے ہوئے جان قربان کرتے ہیں۔‘
شرکا کا کہنا تھا کہ زندہ قومیں اپنے شہداء کو کبھی بھولتی نہیں ہیں۔ پولیس کے یہ عظیم شہداء اپنا آج ملک کے مستقبل پر قربان کر کے آنے والی نسلوں کے لیے مشعل راہ بن گئے ہیں۔
پروگرام کے اختتام پر آئی جی اسلام آباد پولیس ڈاکٹر اکبر ناصر خان نے شہداء پولیس کی قربانیوں کو سراہتے ہوئے لواحقین میں اعزاری شیلڈز بھی تقسیم کیں۔
