پاکستانی نژاد کینیڈین شہری کی نشاندہی پر ایکسائز ڈیپارٹمنٹ نے کراچی کے پوش علاقے ڈیفینس میں گھرقائم منشیات کی فیکٹری پر چھاپا مارکرکروڑروں روپے مالیت کی منشیات اور متعلقہ آلات برآمد کرلیے ہیں۔
سیکریٹری ایکسائز عاطف الرحمن نے اس ضمن میں پریس کانفرنس کرتے ہوئے بتایا کہ کینیڈا پلٹ پاکستانی نے اپنی ڈیفنس کی رہائش گاہ کو منشیات کی کنٹرول درجہ حرارت اور آکسیجن کی فراہمی کے ساتھ تیاری کی ایک عارضی تجربہ گاہ میں تبدیل کر رکھا تھا۔
سیکریٹری ایکسائز کے مطابق ایکسائز ڈپارٹمنٹ نے بنگلے پر چھاپہ مار کر کروڑروں روپے کی منشیات برآمد کرلی ہے، جہاں جدید سائنٹفک طریقہ سے بھنگ کی کاشت کے لیے بیج،کھاد اور مٹی بھی درآمد کی جارہی تھی۔
عاطف الرحمن نے بتایا کہ گزشتہ روز سرفراز نامی پاکستانی نژاد کینیڈین شہری کی گاڑی سے غیر ملکی شراب کی بوتلیں اور منشیات برآمد ہوئی تھیں، معاملے کی مزید تفتیش میں بنگلے میں منشیات سازی کے انکشاف کے بعد چھاپہ مار کر ہوم میڈ منشیات کی فیکٹری کا سامان قبضہ میں لیا گیا۔
سیکریٹری ایکسائز کے مطابق چھاپے میں کروڑوں روپے مالیت کی منشیات کے ساتھ ڈیڑھ کروڑ روپے مالیت کے آلات بھی قبضے میں لیے گئے ہیں۔ انہوں نے بتایا کہ اس نوعیت کی برآمدگی میں ان کے محکمہ کو وسائل کی کمی کے باعث مشکلات کا سامنا ہے۔
’ابتدائی تخمینے کے مطابق 14 کروڑ روپے سے زائد مالیت کی منشیات اس بنگلے سے برآمد کیگئی ہے۔۔۔ ممکن ہے کہ شہر میں اس طرح کے دیگر مقامات پر بھی بھنگ کی کاشت ہورہی ہو ۔۔۔ محدود وسائل کے ساتھ ادارے کے پاس جدید ساز و سامان کی شدید قلت ہے۔‘
