تحریک انصاف نے نگراں وزیراعظم اور چیف الیکشن کمشنر سے مبینہ طور پر جبری لاپتہ کیے گئے اپنے ذمہ داروں سمیت کارکنوں کی بازیابی کا مطالبہ کیا ہے۔
سیکریٹری جنرل عمر ایوب خان نے اس ضمن میں نگراں وزیر اعظم اور چیف الیکشن کمشنر کو الگ الگ خطوط تحریر کیے ہیں۔ خط کی نقول چاروں نگراں وزراء اعلی کو بھی بھجوادی گئی ہیں۔
عمرایوب خان نے اپنے خط میں تحریک انصاف کے رہنما فرخ حبیب، صداقت عباسی، عثمان ڈار، اویس یونس، عرفان سلیم، عبدالکریم خان اور عوامی مسلم لیگ کے سربراہ شیخ رشید کی کئی روز سے لاپتہ ہونے کی جانب توجہ مبذول کرائی ہے۔
’ان تمام افراد کی جبری گمشدگیاں آئین میں فراہم کردہ بنیادی حقوق کی صریح خلاف ورزی ہے، جب تک ان افراد کو رہا اور جبری گمشدگیوں کے ذمہ داران کو کٹہرے میں نہیں لایا جاتا آئندہ عام انتخابات کی شفافیت پر سوالیہ نشان رہے گا۔‘
عمر ایوب خان نے امید ظاہر کی ہے کہ جبری طور پر گمشدہ کیے گئے افراد کے معاملے کو سنجیدگی سے دیکھتے ہوئے متعلقہ اداروں کو ان کی فوری بازیابی کے احکامات جاری کیے جائیں گے۔