لاہور میں بدھ کو ورک فرام ہوم اور بازار بند کیوں ہوں گے؟

حکومت پنجاب کی ہدایت پر لاہورمیں انسداد اسموگ کے لیے انتظامیہ نے بدھ کے روز ورک فرام ہوم اور بازار مکمل طور پر بند رکھنے کی ہدایت کی ہے۔

انسداد اسموگ کے لیے لاہور انتظامیہ کی اپیل پر تاجر تنظیمیں  بدھ کو بازار مکمل طور پر بند رکھنے کی حمایت کر چکی ہیں۔

تفصیلات کے مطابق حکومت پنجاب کی ہدایت کی روشنی میں کمشنر لاہور محمد علی رندھاوا اور سی سی پی او لاہور بلال صدیق کمیانہ نے لاہور میں انسداد اسموگ کے لیے تاجروں کے ساتھ آج ایک اہم ملاقات کی جس میں یہ بھی طے پایا کہ 2 ماہ تک ہر بدھ کے روز چھٹی ہوگی۔

اس موقع پر کمشنر لاہور محمد علی رندھاوا نے کہا کہ تاجروں کے مشکور ہیں کہ انہوں نے انسداد اسموگ کے لیے بدھ کی چھٹی کی حمایت کی ہے، تاجروں کو اجازت ہوگی کہ اگر وہ ضروری سمجھیں تو اتوار کو مارکیٹوں میں کام کرسکتے ہیں۔

 اس ملاقات میں لاہور کی تمام بڑی مارکیٹس و بورڈز کے عہدیداران و نمائندوں نے شرکت کی، مقامی تاجروں نے لاہور انتظامیہ کو انسداد اسموگ کے لیے شجرکاری، پارکنگ دستیابی، تجاوزات کے خاتمے اور مارکیٹس کے اوقات بارے اپنی تجاویز اور مسائل سے آگاہ کیا، لاہور کے تاجروں نے انسداد اسموگ کے لیے ہول سیل مارکیٹس اور ریٹیل مارکیٹس کے اوقات مختلف رکھنے کی تجویز بھی دی۔

اس موقع پر سی سی پی او لاہور نے مارکیٹس سے عارضی تجاوزات کے خاتمے اور ٹریفک روانی کے لیے آپریشن کی یقین دہانی کرائی، انہوں نے کہا کہ اسموگ انسانی صحت کے لیے انتہائی مضر ہے، ہمیں ملکر انتہائی سنجیدہ اقدامات اٹھانے ہوں گے۔

کمشنر اور سی سی پی او لاہور نے تاجروں کو یقین دلایا کہ اس اقدام سے کسی کے کاروبار کو نقصان نہیں پہنچے گا، تاجروں کو اعتماد میں لیکر فیصلے ہونگے، بغیر کور ٹرالی، عمارتی ملبہ اوپن رکھنے اور زیرتعمیر ایریا میں پانی کا چھڑکاؤ نہ کرنے پر سخت کارروائی ہوگی۔

انہوں نے مزید کہا کہ انتظامیہ جگہ مہیا کریگی، ٹریڈرز ایسوسی ایشن اپنے نام کے درخت لگا کر شجرکاری شروع کریں کیونکہ  ڈیٹا کے مطابق اکتوبر اور نومبرمیں اسموگ شدید ہونے کا خدشہ ہے۔