وفاقی وزیراطلاعات مریم اورنگزیب کا کہنا ہے کہ پچھلے 9 ماہ سے ملک میں تماشا لگا ہوا ہے، جیل بھرو تحریک ملک کے خلاف سازش ہے۔ عمران خان جیل بھرو تحریک کی شروعات خود گرفتاری دے کر کریں ۔
اسلام آباد میں پریس کانفرنس کے دوران مریم اورنگزیب نے کہا ملک پر 4 سال نالائقوں اور نااہلوں نے حکمرانی کی۔ ن لیگ کے خلاف یہ لوگ ایک ٹکے کی کرپشن ثابت نہ کر سکے۔ جب کرپشن ثابت نہ ہوئی تو ہیروئین کے مقدمات بنوا کر جیلوں میں بند کروایا جاتا رہا۔
عمران خان کو تنقید کا نشانہ بناتے ہوئے وفاقی وزیر اطلاعات نے کہا پارلیمنٹ نے عدم اعتماد کے ذریعے عمران خان کو باہر پھینکا۔ سوال پوچھو تو کہتے ہیں یہ ملک کے خلاف سازش ہے۔ سازش کی کہانی پر 9 مہینے تک تماشے کیےگئے۔ یہ شخص جانتا ہے کہ سائفر کی کوئی کہانی نہیں تھی۔ یہ جانتا ہے امریکا نے کوئی سازش نہیں کی تھی۔ سازش امریکا سے ہوتے ہوئے محسن نقوی تک آ گئی۔
رہنما ن لیگ نے کہا کہ عمران خان کسی ادارے اور عدالت میں پیش نہیں ہوتا۔ وہ توشہ خانہ کیس میں 2020 سے فرار ہے کیونکہ یہ چور ہے۔ آپ کو ادارے بلارہے ہیں اور آپ جیل بھرو تحریک چلا رہے ہیں۔ اس کے ساتھ ضمانتیں بھی کروا رہے ہیں۔ توشہ خانہ ہو یا سائفر عمران خان کو اپنے اوپر لگی چارج شیٹ کا جواب دینا ہو گا۔
مریم اورنگزیب نے کہا کہ ایک گھریلو خاتون نے سیاسی مخالفین کوغداری سے جوڑنے کا کہا۔ گھریلو خاتون توشہ خانہ کی گھڑیاں بیچتی رہی۔ گھریلو خاتون کے جادو ٹونے نے ملک کو تباہ کیا۔ فرح خان گھریلو خاتون کی فرنٹ مین تھی۔ توشہ خانہ سے ہیروں کے ہار چوری کیے گئے۔ بریف کیس آتے رہے اور گھریلو خاتون وصول کرتی رہیں۔
وزیر اطلاعات نے کہا کہ جیل بھرو تحریک ملک کے خلاف سازش کی تحریک ہے۔ یہ جیل بھرو تحریک نہیں’جیل بچو تحریک‘ ہے۔ عمران خان نے زمان پارک کو ضمانت پارک بنا دیا۔ تمہارے بچے باہر ہیں تو لوگوں کے بچے جیل کیوں جائیں؟
وفاقی وزیر نے کہا کہ اختیارات کا ناجائز استعمال کرکے ملک کو نقصان پہنچایا گیا۔ عمران خان کے پاس جواب نہیں تو جیل بچو تحریک شروع کر دی۔
انہوں نے کہا کہ موجودہ حکومت پی ٹی آئی کی معاشی تباہی سے نمٹ رہی ہے۔ یہ وہی آئی ایم ایف کی ڈیل ہے جو عمران خان کرکے گئے ہیں۔ کیا ہی اچھا ہوتا اگر سییلکٹڈ وزیراعظم اس وقت آئی ایم ایف کو منع کرتا۔
