نگران وزیرِاطلاعات مرتضیٰ سولنگی کی خواہش پر سینیئر مرکزی رہنما پاکستان تحریک انصاف شفقت محمود کی اپنی رہائشگاہ پر ان سے ملاقات کی۔
ملاقات کے دوران ملک میں صاف شفاف انتخابات کے انعقاد، سیاسی جماعتوں کیلئے انتخابات میں شرکت کے مساوی مواقع کے اہتمام اور وسیع قومی مفاہمت سمیت باہمی دلچسپی کے امور پر گفتگو ہوئی۔
ملاقات میں قومی سطح پر ہم آہنگی اور مفاہمت کے فروغ کے امکانات، اہمیت اور ضرورت پر بھی تبادلہ خیال کیا گیا۔
انتخابات کی افادیت ان کے آزادانہ انعقاد کی مرہون منت ہے، شفقت محمود
اس موقع پر گفتگو کرتے ہوئے تحریک انصاف کے شفقت محمود نے کہا کہ انتخابات کی افادیت، ان کے آزادانہ، منصفانہ، غیرجانبدارانہ اور شفاف انعقاد کی مرہونِ منت ہے۔ آزادانہ، منصفانہ، غیرجانبدارانہ اور شفاف انتخابات کے لیے تمام جماعتوں کو انتخابات میں حصہ لینے کے یکساں ماحول اور مساوی مواقع کی فراہمی کو بنیادی حیثیت حاصل ہے۔
مزید پڑھیں
تحریک انصاف کو برابری کے مواقع میسر نہیں
شفقت محمود نے کہا کہ پاکستان تحریک انصاف کو بلاشبہ برابری کی سطح پر سیاسی سرگرمیوں کے مواقع نہیں مل رہے۔
انہوں نے کہا تحریک انصاف کو آئین و قانون کی روشنی میں انتخابی مہم چلانے کی بھی اجازت نہیں جبکہ دیگر جماعتوں کو ملک بھر میں جلسے جلوسوں کی کھلی آزادی ہے۔
وزرات اطلاعات سے ملاقات میں شفقت محمود کا کہنا تھا کہ نہایت ناہموار ماحول میں منعقد کروائے گئے خلاف قاعدہ انتخابات عوامی سطح پر ساکھ اور قبولیت سے محروم رہیں گے۔
فیئر ٹرائل اور انصاف تک مکمل رسائی کو بھی آزادانہ و منصفانہ انتخابات کے ہدف کے حصول میں بنیادی اہمیت حاصل ہے۔
انہوں نے کہا پاکستان تحریک انصاف دستور کے سائے میں انتخابات کے صاف شفاف انعقاد کیلئے ہر ممکن تعاون کے لیے تیار ہے۔
