پاکستانی نژاد سابق برطانوی باکسر عامر خان جو اب یوٹیوب اسٹار کے نام سے جانے جاتے ہیں، ان کی اہلیہ فریال مخدوم کو فلسطین کے مظلوم عوام کی حمایت کرنے پر سنگین دھمکیوں کا سامنا ہے۔
فریال مخدوم نے سوشل میڈیا سائٹ انسٹا گرام پر ایک اسکرین شارٹ شیئر کیا ہے جس کے مطابق انہیں اسرائیل کے نامعلوم نمبر سے دھمکی آمیز پیغام بھیجا گیا ہے۔
عامر خان کی اہلیہ کو دی گئی دھمکی میں کہا گیا ہے کہ فلسطین کے عوام کی حمایت چھوڑ کر اسرائیل کے ساتھ کھڑی ہو جائیں، اور موقف سے باز نہ آنے کی صورت میں سنگین نتائج کے لیے تیار رہیں۔
فریال نے اسکرین شارٹ کے ساتھ لکھا کہ گزشتہ رات مجھے یہ دھمکی آمیز پیغام بھیجا گیا ہے اور کوشش کی جارہی ہے کہ میں سچ کے ساتھ کھڑی نہ ہوں۔
واضح رہے کہ عامر خان کی اہلیہ اسرائیل کی جانب سے غزہ پر کیے جانے والے حملوں کی شروع سے مخالفت کر رہی ہیں اور سوشل میڈیا پر فلسطین کے عوام کے حق میں آواز اٹھاتی ہیں۔
یہ بھی یاد رہے کہ اسرائیل اور فلسطین کی مزاحمتی تنظیم ’حماس‘ کے درمیان کشیدگی کے بعد پیدا شدہ صورت حال انتہائی تشویشناک ہو چکی ہے اور اسرائیل کی جانب سے غزہ پر مسلسل بمباری کی جا رہی ہے۔
اسرائیل نے اشارہ دیا ہے کہ وہ کسی بھی وقت غزہ پر زمینی فوج کے ذریعے چڑھائی کر دے گا جبکہ ’حماس‘ کی جانب سے خبردار کیا گیا ہے کہ ایسا کرنے کی صورت میں اسرائیل 7 اکتوبر کا آپریشن بھول جائے گا۔
