پاکستان تحریک انصاف (پی ٹی آئی) کی جیل بھرو تحریک کے تیسرے مرحلے میں راولپنڈی میں رضاکارانہ گرفتاری دینے کا سلسلہ شروع جاری ہے۔راولپنڈی کے کمیٹی چوک میں تحریک انصاف کی ضلعی قیادت سمیت درجنوں کارکنان رضاکارانہ گرفتاری پیش کر چکے ہیں۔
وی نیوز کے مطابق راولپنڈی کے کمیٹی چوک پر تحریک انصاف کے مرکزی رہنما ذلفی بخاری کے علاوہ واثق قیوم ، فیاض الحسن چوہان ، صداقت عباسی اور اعجاز نیازی سمیت کارکنان کے بڑی تعداد رضاکارانہ گرفتاری دے چکی ہے۔
آمدہ اطلاعات کے مطابق اب تک پانچ پولیس وینز رضاکارانہ گرفتاری دینے والوں کو لیکر اڈیالہ جیل کے لیے روانہ ہوچکی ہیں۔ جب کہ دو مزید وینز میں اور اس کی چھت پر کارکنان رضاکارانہ سوار ہوچکے ہیں۔
اس موقع پرقیدیوں کی وین میں سوار ذلفی بخاری نے اپنے پیغام میں کہا کہ اس وقت ساری لیڈر شپ ہمارے ساتھ موجود ہے، میں جی بی اور کراچی سے آئے ہوئے ساتھیوں کا شکریہ ادا کرتا ہوں۔
انہوں نے کہا کہ اٹک سے آنے والے تحریک انصاف کے ساتھی بالخصوص نوجوانوں اور خواتین کا خاص طور پر شکریہ ادا کرتا ہوں۔ اٹک نے ہمیشہ میرا ساتھ دیا ہے میں کبھی بھی آپ کا ساتھ نہیں چھوڑوں گا۔
جیل بھرو تحریک کے تیسرے مرحلے میں راولپنڈی میں رضاکارانہ گرفتاریاں دینے کے سلسلے میں سربراہ مجلس وحدت المسلمین علامہ راجہ ناصر عباس نے بھی ساتھیوں سمیت گرفتاری پیش کر دی۔
