سیکیورٹی فورسز کے ضلع پشاور کے علاقے بڈھ بیر میں آپریشن کے دوران 4 انتہائی مطلوب دہشت گرد مارے گئے جبکہ فائرنگ کے تبادلے میں پاک فوج کا جوان شہید ہوگیا۔
آئی ایس پی آر کے مطابق 16 نومبر 23 کو سیکیورٹی فورسز نے دہشت گردوں کی موجودگی کی اطلاع پر بڈھ بیر میں انٹیلی جنس کی بنیاد پر آپریشن کرکے مؤثر طریقے سے دہشت گردوں کے ٹھکانے کو نشانہ بنایا جس کے نتیجے میں انتہائی مطلوب دہشت گرد کمانڈر سمیع اللہ عرف شینائے، کمانڈر سلمان احمد، عمران عرف محمد اور حضرت عمر عرف خالد ہلاک ہوگئے۔
ترجمان کے مطابق مارے گئے دہشت گردوں سے اسلحہ، گولہ بارود اور دھماکہ خیز مواد بھی برآمد ہوا جو علاقے میں بھتہ خوری اور ٹارگٹ کلنگ سمیت دہشت گردی کی متعدد کارروائیوں میں سرگرم رہے۔
ایک اور آپریشن ضلع ڈیرہ اسماعیل خان کے علاقے کلاچی میں کیا گیا۔ دہشت گردوں کے ساتھ شدید فائرنگ کے تبادلے میں باغ، آزاد کشمیر سے تعلق رکھنے والے 34 سالہ لانس نائیک محمد اعجاز خان شہید ہوگئے۔
علاقے میں پائے جانے والے کسی بھی دوسرے دہشت گرد کو بے اثر کرنے کے لیے آس پاس کے علاقوں میں کلیئر نس آپریشن جاری ہے ۔ آئی ایس پی آر کا کہنا ہے کہ پاکستان کی سیکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں۔
